Կառավարության շենքի դիմաց բողոքի դուրս եկած քաղաքացիները, որոնք պահանջում են չթանկացնել գազի սակագինը, երթով շարժվել են դեպի Հանրային ծառայությունները կարգավորող հանձնաժողովի շենք:

Նրանք իրենց ձեռքին պարզել են «Գազի գնի բարձրացումը կդառնա վարչախմբի տապալման սկիզբը», «Ապահով Հայաստանում գազը թանկացնում եք, որ ի՞նչ անեք», «Գազը թանկացնեք, հարկերը չենք մուծելու», «Ինչքան ուզենք, այնքան ենք վճարելու» պաստառներ:

Բողոքի ակցիայի մասնակիցներին հանդիպել է Հանրային ծառայությունները կարգավորող հանձնաժողովի նախագահ Ռոբերտ Նազարյանը: Նա նշել է, թո «ՀայՌուսգազարդ» ընկերությունը հայտ է ներկայացրել սակագնի վերանայման հետ կապված, որի հիմքն այն է, որ սահմանի վրա գազի գինը ռուսական կողմը սահմանել է 270 դոլար նախկին 170–ի փոխարեն։

«Գազի գինը հաստատ բարձրանալու է, ես էլ շատ կուզենայի ընդհանրապես չբարձրանար, բայց, իհարկե, բարձրանալու է, իսկ թե ինչ չափով, դա է հիմա քննարկվում: Հանրային լսումները կլինեն բաց բոլորի համար»,– տեղեկացրել է  Ռոբերտ Նազարյանը:

Իսկ նախագահական նստավայրի մոտ գազի գնի թանկացման դեմ ակցիան ավարտվել է։ Ցուցարարներն իրենց բողոք-նամակը փոխանցել են նախագահ Սերժ Սարգսյանին և հեռացել։