Բացի որոշ միջադեպերից, ընտրական տեղամասերում ընտրություններն անցկացվել են կանոնավոր և տեխնիկապես լավ կազմակերպված.նման գնահատական են տվել Երևանի ավագանու ընտրությունները դիտարկած Եվրոպայի խորհրդի տեղական և տարածաշրջանային իշխանությունների կոնգրեսի պատվիրակությունը:

Պատվիրակության ղեկավար Ստյուարտ Դիքսոնի խոսքով, կային ընտրողներ, որոնք այլևս չեն բնակվում Հայաստանում, բայց մնացել են ընտրողների ցուցակներում, ըստ նրա, իշխանությունները պետք է այս հարցին լուծում գտնեն՝ չարաշահումներից խուսափելու համար: Ստյուարտ Դիքսոնն ընդգծել է, որ քվեարկության գաղտնիությունը մեծապես պահպանված էր, ցնդող թանաքի որակի առումով դիտորդները բարելավում են նկատել:

Դիտորդների արձանագրված առաջընթացը «հակակշիռների համակարգի» ներդրումն է:

Ստյուարտ Դիքսոնը  խոչընդոտ է համարել բջջային հեռախոսների օգտագործումը: Նրա մոտ  տպավորությունն է ստեղծվել, որ որոշ լրատվամիջոցների ու հասարակական կազմակերպությունների ներկայացուցիչներ գործում էին կոնկրետ քաղաքական ուժերի համար:

«Ամենակարևորը ընտրական գաղտնիությունն է, որպեսզի յուրաքանչյուր քաղաքացի, անկախ նրանից, թե ով է ուղղորդում, ունենա գաղտնի քվեարկության ամբողջական հնարավարություն»,-ասել է Դիքսոնը:

ԵԽ դիտորդներն իրենց գնահատականներն առավել հանգամանալից կներկայացվեն հոկտեմբերին ներկայացվելիք  դիտորդական առաքելության վերջնական զեկույցում: