Նախնական տվյալներով` Երևանի ավագանու 2013թ-ի ընտրություններին մասնակցել է 437021 ընտրող կամ` ընդհանուր թվի 53,53%-ը:

Ի դեպ, չորս տարի առաջ, ավագանու ընտրություններին մասնակցել են ավելի քիչ ընտրողներ` 404634:

Փաստորեն, կործանարար արտագաղթը չի ազդել երևանցիների ակտիվության վրա: Ավելին, մոտ 30000 մարդ համակվել է քաղաքացիական ակտիվությամբ և որոշել է այս անգամ մասնակցել ընտրություններին:

Կարելի է նաև ենթադրել, որ արտագաղթ կոչվող չարիքը շրջանցել է Երևանը` ավեր գործելով միայն Հայսատանի մարզերում:

Ընտրությունների ակտիվություն է նկատվել հատկապես Նորք-Մարաշ, Աջափնայակ, Նուբարաշեն, Շենգավիթ և Ավան համայնքներում:

Դիտորդների հավաստմամբ` գործող քաղաքապետ Տարոն Մարգարյանի բնակավայրում եղել է վարչական ռեսուրսի տոտալ կիրառում:

Աջափնյակ և Շենգավիթ համայնքներում գործի են դրվել ընտրակեղծարարության հին ու նոր մեթոդները:

Պասիվ են եղել Մալաթիա-Սեբաստիա (44,90%) և Կենտրոն (47,79%) համայնքների ընտրողները: Այս համատեքստում` կասկածելի են հնչում ընդդիմության այն պնդումները, թե Մալաթիա-Սեբաստիա համայնքում կազմակերպված կեղծիքներ են եղել: Թեև` հարկ է սպասել ձայների հաշվարկի ավարտին:

Իշխանության ներկայացուցիչները գոհ են և խոսում են ոչ էական խախտումների մասին, ընդդիմությունն ահազանգում է տոտալ ընտրակեղծիքների մասին և հոռետեսական կանխատեսումներ անում:

ԱԺ ԲՀԿ խմբակցության անդամ Վահան Բաբայանն իր ֆեյսբուքյան էջում գրել է. «Հաշված ժամեր են մնացել մեր այս արդեն կարելի է ասել խայտառակ ընտրությունների ավարտին, հերթական անգամ իշխող կուսակցությունը ապացուցեց, որ անկարող է Հայաստանում կազմակերպել արդար և ազատ ընտրություններ: Անձամբ եղել եմ բազմաթիվ տեղամասերում և տեսել այն ամենը ինչ ամբողջ համացանցում այս պահին քննարկվում է: 90- ականներ հիշեցնող այս ընտրությունների հետևանքները դեռ առջևում են»:

«Բարև Երևան» դաշինքի նախընտրական շտաբը տարածել է հայտարարություն, որում, մասնավորապես, ասված է. «Ընտրական գործընթացի քվեարկության փուլը անցավ աննախադեպ լարված մթնոլորտում և մեր ներկայացուցիչներն արձանագրել են բազմաթիվ ընտրախախտումներ, որոնց ամփոփ գնահատականը մեր կողմից կտրվի ընտրությունների ավարտից հետո: 19:00-ի դրությամբ ընտրական հանձնաժողովների՝ ոչ իշխանական ուժերը ներկայացնող անդամները և վստահված անձիք շարունակում են պայքարել իշխանությունների կողմից ընտրությունների արդյունքների խեղմանն ուղղված քայլերի դեմ: Սակայն ըստ մեզ հասած տեղեկությունների՝ իշխանությունները որոշել են վերջին պահին գնալ էլ ավելի կոշտ ընտրախախտումներ իրականացնելու ճանապարհով, այդ թվում՝ քվեների հաշվարկի ժամանակ ձայնագողության և ընդդիմության անդամ հանդիսացող ներկայացուցիչների հանդեպ ճնշումների գործադրման: Թիրախի տակ են հատկապես Ավան, Մալաթիա—Սեբաստիա, Դավթաշեն և Էրեբունի համայնքների ընտրատեղամասերը»:

ՀԱԿ համամասնական ցուցակի երկրորդ համար Զոյա Թադևոսյանն երևանյան մթնոլորտը զզվելի է որակել:

Ոստիկանությունն, իր հերթին, երեք քրեական գործ է հարուցել` կրկնակի քվեարկության փաստերի առթիվ:

Սուրեն Սուրենյանց