Երևում է` ՀՀ նախկին արտգործնախարար Վարդան Օսկանյանը «լվացքի» նկատմամբ մեծ սեր ունի: Երևանի ավագանու ընտրություններում ԲՀԿ ցուցակը գլխավորող Վարդան Օսկանյանը քարոզարշավի շրջանակներում շարունակում է համոզել ընտրողներին, որ քաղաքապետ դառնալու դեպքում կարող է դրսում ունեցած իր կապերի շնորհիվ ներդրումներ ապահովել Երևանում և ծաղկեցնել մայրաքաղաքը:

Պարոն Օսկանյանը երևի մոռացել է, որ հենց դրսում ունեցած իր  «արտաքին կապի» պատճառով է փողերի լվացման փաստով ԱԱԾ-ում քրեական գործ հարուցվել իր դեմ: Խոսքն ամերիկացի միլիարդատեր, մորմոնների առաջնորդ համարվող Ջոն Հանթսմանի հետ ունեցած և Ռոբերտ Քոչարյանի նախագահության տարիներին ամրապնդած կապի մասին է:

Հիշեցնենք, որ 1988-ի երկրաշարժից հետո մեզ մոտ բարեգործական ծրագրեր սկսած Ջոն Հանսթմանը 18 տարի շարունակ հատուկ ընդունելության չի արժանացել Հայաստանի բարձրագույն իշխանության կողմից: Եվ միայն 2006-ին, այն ժամանակվա արտգործնախարար Վարդան Օսկանյանի ջանքերի շնորհիվ Ռոբերտ Քոչարյանն է սկսել հատուկ մեծարանքի արժանացնել «Հիսուս Քրիստոսի վերջին օրերի սրբերի եկեղեցուն» կամ մորմոնների ուսմունքին հարող Ջոն Հանթսմանին: Հենց վերջինիս կողմից 1990թ-ին Երևանում հիմնադրված և Սերժ Սարգսյանի պաշտոնավարման ժամանակ վաճառված  «Հանթսման բիլդինգ փրոդաքթս» ՍՊԸ-ի և «Սիվիլիթաս» բարեգործական հիմնադրամի միջև կատարված գործարքն ու դրա հետ կապված գումարային շարժն են դարձել Վարդան Օսկանյանի դեմ քրգործ հարուցելու հիմք: Ըստ ԱԱԾ հաղորդագրության` ԱՄՆ-ում գրանցված «Փոլիմեր Մաթերիալս» և «Հանթսման Ինթերնեյշնլ» կորպորացիաներին պատկանող,  Հայաստանում հիմնադրված «Հանթսման Բիլդինգ Փրոդաքթս» ընկերության 100 տոկոս բաժնեմասերը շուրջ 2 միլիոն դոլարով վաճառվել են, սակայն գործարքը ոչ ճիշտ պայմանագրային ձևակերպումների արդյունքում հարկային մարմնին չի ներկայացվել, հարկային պարտավորությունները չեն կատարվել, Հայաստանում թողնված և բացառապես բարեգործության համար նախատեսված այս գումարներից մոտ 1 միլիոն 135 հազար դոլարը իրականում բարեգործական նպատակներին չի ուղղվել, այլ փոխանցվել է «Սիվիլիթաս» հիմնադրամի նախագահ

Վարդան Օսկանյանի և նույն հիմնադրամի հոգաբարձուների խորհրդի անդամ Տիգրան Կարապետյանի անուններով բացված հաշվեհամարներին։ Բացի այդ, «Սիվիլիթաս» հիմնադրամը 2011-ին հաշվետվություն չի ներկայացրել ֆինանսավորման աղբյուրների, ֆինանսական տարում օգտագործած միջոցների, այդ թվում` «Փոլիմեր Մաթերիալս» և «Հանթսման Ինթերնեյշնլ» կորպորացիաների կողմից բարեգործական նպատակներով հատկացված մոտ 2 միլիոն դոլար գումարի վերաբերյալ:

Թե ինչ քաղաքական նպատակների կարող են ծառայել բարեգործության անվան տակ կատարվող ծրագրերը` կռահելը դժվար չէ…

Խոսելով Վարդան Օսկանյանի հիշատակած «արտաքին կապերի» մասին` նշենք, որ զարգացած որոշ երկրներում օրենսդրական այսպիսի պրակտիկա կա. հատկապես բարձրաստիճան պաշտոնյաներին, պաշտոնավարման ավարտից հետո, 3 կամ 5 տարի արգելվում է հասարակական որոշակի գործունեությամբ զբաղվել: Սահմանափակման պատճառն այն է, որ պաշտոնավարման ընթացքում ձեռք բերված պաշտոնական տվյալներն ու արտաքին կապերը կարող են հետագայում օգտագործվել ոչ ի շահ գործող իշխանության: Իսկ արգելքի ժամկետը կարող է թուլացնել տվյալ պաշտոնյայի «արտաքին» կապերը և հնացնել նրա տիրապետած տեղեկատվությունը` թուլացնելով երկրի խոցելիության աստիճանը:  Երևի Հայաստանին այսպիսի մի օրենք է պետք, որպեսզի Վարդան Օսկանյանը չհայտնվի «փողեր լվացողի» գլխավոր դերում, ու մեկից դեռ չպրծած` չմտածի արդեն Երևանի մակարդակով «լվացքատուն» բացելու մասին:

Երևի մի օրենք էլ պետք է մշակել հատուկ պաշտոնյաների` օրինախախտ հարազատների և մերձավորների վերաբերյալ, ովքեր փորձում են պետական միջոցները վատնել, քաղաքացիներին ծեծել` օգտվելով քաղաքական այս կամ այն իշխանության հովանավորչությունից:

Հիշեցնենք, որ այս տարվա հունվարին լրատվամիջոցները գրեցին նույն Վարդան Օսկանյանի որդու` Արման-Մինաս Օսկանյանի մասնակցությամբ, Երևանում տեղի ունեցած ծեծկռտուքի մասին: «Էդեմ» ակումբի դիմաց` Թումանյան և Իսահակյան փողոցների խաչմերուկում, նա իր երկու ընկերների հետ ծեծի էր ենթարկել մի երիտասարդի` ջարդելով նրա քիթը: Լուրը  հաստատել էին ոստիկանությունում` նշելով, որ ընթանում է քննություն: Տարիներ առաջ էլ լուրեր էին տարածվել, թե Վարդան Օսկանյանի որդին ավտովթարի է ենթարկել հոր ծառայողական ավտոմեքենան…

Իհարկե, քրեական հետապնդումների տակ քաղաքական շահ էլ է թաքնված լինում, քանի որ օրինակ` աջուձախ վատնվում են պետական փողերը` պաշտոնյաների ընտանիքների անդամներին սպասարկելով, բայց դրա համար ոչ ոք պատասխան չի տալիս:   

Էլմիրա Մարտիրոսյան