«Ոստիկանության զորքերի մասին» ՀՀ օրենքում նախատեսված փոփոխությունների քննարկման ժամանակ ԱԺ «Հայ ազգային կոնգրես» խմբակցության պատգամավոր Նիկոլ Փաշինյան դիմել է  ՀՀ Ոստիկանության պետի տեղակալ Արթուր Օսիկյանին.

«Պարո՛ն Օսիկյան, վերջին օրերին շատ լայնորեն լուսաբանվում էր այն հարցը, թե ինչպես էր ոստիկանության պետը հայտարարում, որ Գյումրիի դեպքերի հետ կապված ԱԺ պատգամավորներ են զանգահարել իր տեղակալներին և ինչ-որ հարցերով դիմել։ Առաջին հարցը հետևյալն է. արդյոք դու եք այդ տեղակալը, որին զանգել են և ովքեր են եղել զանգահարողները։

Երկրորդ հարցս հետևյալն է. Ոստիկանությունն իրեն թույլ է տվել այսպիսի արտահայտություն. «Դուք պատգամավո՞ր եք, թե՞ գողական, արա՛»։ Հարցս հետևյալն է՝ այդ երբվանի՞ց է ՀՀ ոստիկանության պետը պատգամավորների հետ խոսում «արա»-ով։ Ես սա հատուկ եմ շեշտում, որովհետև, եթե նա շեշտեր անուն ազգանունը դա կլիներ ուրիշ իրավիճակ, բայց եթե նա չի շեշտում անուն-ազգանունը, նա «արա»-ով դիմում է կարգավիճակին, այսինքն՝ ԱԺ պատգամավորներին։  Եթե նա հաջորդ անգամ նման տոնով ու «արա»-ով խոսի պատգամավորների մասին, ապա կարող եք նրան փոխանցել, որ ես էլ նույն կերպ կդիմեմ նրան:

Եթե կա «արա» ու գողական Ազգային ժողովում, թող ոստիկանապետը բարի լինի այդ անունները հրապարակել, որպեսզի բոլորին ամեն ինչ պարզ լինի։ Հակառակ դեպքում, եթե նման ոճը կրկնվի և այդպիսի ասելիքը տարածվի կարգավիճակի վրա, կրկնում եմ՝ ես ինքս պարտավորվում եմ ոստիկանապետին արժանացնել համարժեք պատասխանի»։

Արթուր Օսիկյանը նախ նշել է, որ ցանկություն չունի արձագանքելու պատգամավորի խոսքերին, ապա ավելացրել. «Ո՛չ, ինձ չեն զանգահարել, չգիտեմ ում մասին է խոսքը, և երկրորդը՝ կոչ եմ անում նաև կոռեկտության սահմաններն ամեն դեպքում պահպանել»:

ՀԱԿ պատգամավորն էլ հակադարձել է. «Կարծում եմ՝ դուք այստեղ կոռեկտության կոչ անելու որևէ հիմք չունեիք, և հույս ունեմ, որ դուք կոռեկտության իմ կոչը կփոխանցեք Ձեր ղեկավարին»: