Հայաստանի առջև ծառացած թիվ մեկ խնդիրն արտագաղթն է. սա սոցիալական արտագաղթ չէ, սա անպաշտպանվածության արտագաղթ է, այս մասին այսօր լրագրողների հետ հանդիպման ժամանակ ասել է  ՀԱԿ խմբակցության քարտուղար Արամ Մանուկյանը:

Նրա խոսքով, սա ընտրություններից հետո նոր թափ առած արտաղագթ է և շարունակվելու դեպքում երկրի բանակ, կրթություն, հարկատու և մնացած համակարգերը կքայքայվեն:

«Այն, ինչ տեսա սահմանի վրա` սահմռկեցուցիչ էր: 300-400  երիտասարդ տղամարդ գնում էր: Գնում են գլխիկոր, ջարդված, մի մասը՝  հիասթափված, մի մասը՝ փրկված, և  սա դեռ միայն ցամաքային սահմանն է, մի մասն էլ գնում է ինքնաթիռով»-նշել է նա։

Ըստ Մանուկյանի, 4 քաղաքական ուժեր միավորվելով `կարող են Երևանը իշխանության ձեռքից վերցնել, այժմ քաղաքացին վերահսկողությունից դուրս է եկել:

«Բայց մեզանից վատթար լինելը մխիթարանք չէ։ Եվրոպական կառույցները հույսները կտրել են և՛ Հայաստանից, և՛ Ադրբեջանից՝ թե՛ դեմոկրատիայի, թե՛ Արցախի հարցերում։ Սա շատ վատ է, և դրան գումարվում է մեր իշխանությունների ոչ լեգիտիմությունը, որն ուղիղ համեմատական է, նման վիճակին»,-նկատել է պատգամավորը:

Անդրադառանալով, երեկ տեղի ունեցած ՀԱԿ հանրահավաքին, Արամ Մանուկյանն ընդգծել է, որ միտինգին մասնակցում էր այնքան մարդ, որքան վերջին միտինգներին, բայց մարդաքանակը չէր, որ որոշիչ էր, այլ՝ ոգին, որը կար։

«Շատ լավ հանրահավաք էր, ոգևորող էր էներգետիկան, երթից ուղղակի հաճույք ստացա, տրամադրություն կար, մարդ ես զգում քեզ, արժանապատիվ, քաղաքացին քաղաքացի էր, աչքերում լույս կար, պայքար կար»,-կարծում է  ՀԱԿ խմբակցության քարտուղարը:

Ինչ վերաբերում է Արմեն Աշոտյանի այն հայտարարությանը, թե Լևոն Տեր-Պետրոսյանը նման է Ալլա Պուգաչովային՝ ամեն անգամ ասում է՝ էլ չեմ երգելու, ու էլի երգում է,  Արամ Մանուկյանը պատասխանել է «Ես լկտիներին չեմ մեկնաբանում»: