«Արմենիա միջազգային  օդնավակայաններ» կազմակերպությունն օրերս դիմել է Երևանի քաղաքապետարանին՝ «Զվարթնոց» օդանավակայանի հին շենքը քանդելու թույլտվություն ստանալու նպատակով: Ընկերությունն իր դիմումը պատճառաբանել է շենքի տեղում «հարթ տարածք ունենալու» պատրվակով:

Երևանի քաղաքապետարանին կից քաղաքաշինության խորհուրդը միաձայն մերժել է «Արմենիայի» դիմումը, սակայն հասարակությունն ու մասնագետները մտավախություն ունեն, որ «Զվարթնոցի» հին շենքը, ի վերջո, կքանդվի, նույնիսկ՝ օրենքի խախտումով, ինչպես դա եղավ Փակ շուկայի դեպքում:

Այդ մտահոգությունները կիսում է նաև Հայաստանի Ճարտարապետների միության նախագահ Մկրտիչ Մինասյանը: Նա այսօր հյուրընկալվեց «Վարկած» մամուլի ակումբում:

Պարոն Մինասյանը նույնպես կտրականապես դեմ է «Զվարթնոցի» շենքի քանդմանը, սեփականատիրոջ բերած փաստարկներին: «Այդ շենքը մեծ արժեք ունի: Իսկ սեփականատիրոջ բերած մտահոգությունները, որ կոնստրուկցիաները թույլ են, վերջին հաշվով կարելի է վերականգնել, ուժեղացել ու պահել»,- ասաց նա:

Մ. Մինասյանը նշեց, որ այդ շենքը Սովետական շրջանի մոդեռնիստական ստեղծագործությունների շարքին է պատկանում, միութենական մրցանակի է արժանացել, ըստ այդմ՝ հատուկ հոգատարության կարիք ունի: «Մեզ մոտ հակառակն է. այն շենքերը, որոնք պահպանելու ու ապրելու իրավունք ունեն, ուզում են արագ ոչնչացնել»,- մտահոգություն հայտնեց Մ. Մինասյանը: Նա դառնությամբ հիշեց Փակ շուկայի օրինակը. «Մի օրինակ չկա, որ սեփականատերը գներ ու աչքի լույսի պես պահեր»:

Հիշեցնենք «Արմենիա միջազգային օդանավակայաններ» ընկերության սեփականատերը արգենտինահայ Էդուարդո Էռնեկյանն է:

Ի դեպ, կառավարության 2 մասնաշենքի (ԱԳՆ)  շենքի սեփականատերն ևս Էռնեկյանն է և ամենևին զուր չէ «Վարկած» ակումբի այսօրվա հյուրի մտավախությունն, որ այդ շենքի տեսքը նույնպես կարող է փոխվել: