Մեր քաղաքական գործիչները սիրում են պատեհ-անպատեհ խոսել, թե ինչքան են նվիրված երկրին կամ ինչքան են ձգտում փոփոխությունների: Իրականում` մեր քաղաքական ընտրանին կոմֆորտ է սիրում: Երեկ կիրակի էր, ու բավականին ձանձրալի քարոզարշավ, որովհետև տղերքը հանգստանում էին:

Ընտրությունների տասնհինգերերոդ օրը տհաճ մեկնարկ է ունեցել. այրվել է Վիլնյուսի 58 հասցեում տեղակայված ԲՀԿ նախընտրական շտաբերից մեկը: Հրդեհի պատճառը տեխնիկական է, քաղաքական շարժառիթներ, բարեբախտաբար, չկան: Բարգավաճականներին օգնության են հասել ԱԻՆ աշխատակիցները` այն գերատեսչության, որի ղեկավարն է Արմեն Երիցյանն` այս ընտրություններում ԲՀԿ մրցակից ուժերից մեկի ցուցակի առաջին համարը:

Իսկ հիմա` բուն ընտրարշավի մասին:

ԲՀԿ համամասնական ցուցակի առաջին համար Վարդան Օսկանյանը, ԱԺ ԲՀԿ խմբակցության պատգամավորներ Նաիրա Զոհրաբյանը և Վահան Կարապետյանը հերթական հանդիպումն են ունեցել Աջափնյակ համայնքում, այս անգամ` «Հայբուսակ» համալսարանում:

Եթե նկատել եք` հատկապես այս համայնքում ԲՀԿ անդամները բազմաթիվ հանդիպումներ են ունեցել: Դա Վահան Կարապետյանի հեղինակության շնորհիվ է. նա ապրում է Աջափնյակում, մեծ հեղինակություն է վայելում, 2012թ-ի խորհրդարանական ընտրություններում, մեծամասնական ընտրակարգով, չնչին տարբերությամբ զիջել է գլխավոր դատախազի եղբորը (Կարապետյանը պատգամավոր է դարձել համամասնական ընտրակարգով), հիմա էլ որոշել է, որ իր կուսակցության քարոզչությունը պետք է իրականացնի համայնքի յուրաքանչյուր թաղում:

Երեկ Ն. Զոհրաբյանը դարձյալ քննադատել է կառավարությանը, Վ.Օսկանյանը խոսել է ՀՀԿ քաղաքական մենաշնորհի վերացման անհրաժեշտության մասին: ԱԳ նախկին նախարարը հասկացրել է, որ եթե երկրում փոփոխություններ չլինեն, արտագաղթի նոր ալիքն անխուսափելի է: «Մեր բարեկամները, հարևանները ճամպրուկային տրամադրության մեջ են, մենք անդունդի եզրին ենք: Եթե այսպես շարունակենք, իսկապես հնարավոր չէ այս երկիրը պահել, սա ազգային անվտանգության խնդիր է: Մայիսի 5-ի ընտրությունները եթե չօգտագործենք Երևանում իշխանափոխություն անելու համար, հաջորդ չորս-հինգ տարիներին ամեն ինչ նույնությամբ կշարունակվի, ոչինչ չի փոխվի, դրա վառ ապացույցը վարչապետի վերանշանակումն է»,- ասել է նա:

Նույն Աջափնյակում քարոզչություն են փորձել իրականացնել ՀԱԿ երիտասրդները, սակայն նրանց խանգարել են ՀՀԿ անդամները: ilur.am կայքի տվյալներով` ՀԱԿ երիտասարդներից մեկը հաղորդում է ներկայացրել ոստիկանություն:

Դաշնակցության, «Ժառանգության» և ՕԵԿ ներկայացուցիչները սահմանափկվել են հարցազրույցներով, ֆեյսբուքյան գրառումներով:

«Եթե ընդդիմության ներկայացուցիչներն առանձին-առանձին հավաքեն առավելագույն ձայներ և ունենան ավագանու ավելի մեծ թիվ, քան իշխանությունը, տարօրինակ կլինի, եթե ընդդիմության որևէ ուժ չմիավորվի և ընդդիմադիր քաղաքապետ չընտրվի»,- tert.am կայքին տված հարցազրույցում ասել է ՀՅԴ Հայաստանի Գերագույն մարմնի փոխներկայացուցիչ Աղվան Վարդանյանը: ԱԺ ՀՅԴ խմբակցության ղեկավար Արմեն Ռուստամյանն էլ ասել է, որ փոփոխություններ կարելի է ակնկալել, եթե Երևանի քաղաքապետ դառնա ընդդիմության ներկայացուցիչը:

ՕԵԿ համասնական ցուցակի առաջին համար Արմեն Երիցյանը կարևորել է քաղաքային իշխանության պատասխանատվության հանգամանքը: «Յուրաքանչյուրն իր կրթության «գյորա» պետք է զբաղվի իր աշխատանքով: Ի՞նչն է պատճառը, որ շատերն իրենց թաղապետերին չեն ճանաչում: Բա՞ չգնան ամիսը մեկ շրջեն, բնակիչների հետ շփվեն: Բա՞ չհավաքվենք, ասենք, արա, էս ինչ եք անում: Մենք եռամսյակը մեկ պետք է հանդիպենք և հաշվետվություն տանք, թե ինչի վրա են ծախսվում բնակիչներից գոյացված գումարները», — ասել է պարոն Երիցյանը:

ՀՀ ԱԺ «Ժառանգություն» խմբակցության անդամ Թևան Պողոսյանն իր ֆեյսբուքյան էջում գրել է. «Ժառանգություն ասելով տարիներ շարունակ մարդիկ առաջին հերթին հասկացել են իրենց իրավունքների համար պայքարող և փոփոխությունների համար կանգնած ազնիվ մարդկանց թիմ: Երևանի ավագանու ընտրություններին էլ «Բարև Երևան» դաշինքը նույն թիմային ոգով է ներկայացել: Մենք խոստանում ենք քաղաքային իշխանություններ, որոնք ճիշտ նույն կերպ կկանգնեն Երևանի և մայրաքաղաքի բոլոր բնակիչների կողքին, կպայքարեն յուրաքանչյուրի իրավունքների համար ու կբերեն թիմային թարմ ոգի: Հավատում եմ, որ ազնիվ ու ամուր մարդիկ շատ բան կարող են փոխել մեր կյանքում և մեր մայրաքաղաքում, հետևաբար հավատում եմ «Բարև Երևանի» հաղթանակին»:

Իսկ Երևանի գործող քաղաքապետ Տարոն Մարգարյանն երեկ զբաղված է եղել իր պաշտոնական գործառույթների իրականացմամբ: Նա հանդիպել է 2012թ-ին Երևանը գրքի համաշխարհային մայրաքաղաք հռչակելու ամփոփիչ միջոցառումների շրջանակում կազմակերպված «Ի սկզբանե էր բանն» պոեզիայի միջազգային առաջին փառատոնին մասնակից օտարերկրյա գրողների պատվիրակության անդամների հետ:

Սուրեն Սուրենյանց