Երևանի ավագանու ընտրարշավի շրջանակներում, ՀՀԿ-ն և ԲՀԿ-ն շարունակում եմ մարդաշատ հանդիպումներ ունենալ Երևանի տարբեր համայնքներում:

Երեկ Տարոն Մարգարյանի թիմն Աջափնյակում է եղել, ԲՀԿ նախընտրական ցուցակի առաջին համարները գերադասել են իրենց խոսքն ասել Երևանի ծայրամասերի ընտրողներին` հյուրընկալվելով Նոր Խարբերդում, Անաստասավանում:

Հանրապետականները դարձյալ խոսել են իրենց արածի և պլանավորածի մասին, Բարգավաճի անդամները քննադատել են քաղաքային իշխանությանը, կարևորել են ընդդիմադիր քաղաքապետ ունենալու հանգամանքը:

Նորմալ է նաև, օրինակ, ԱԺ ՀՀԿ խմբակցության անդամ Գարիկ Նուշիկյանի հայտարարությունն` իրենց թեկնածու-գործող քաղաքապետի բարձր վարկանիշի մասին: Նույն կերպ է վարվում նաև ԲՀԿ խմբակցության անդամ Գուրգեն Արսենյանը, որը պնդում է, որ իրենք ամենաարդյունավետ ընտրարշավն են վարում: Նույն տրամաբանության մեջ` բհկ-ական Նաիրա Զոհրաբյանը խոսում է իր կուսակցության գրեթե անխուսափելի հաղթանակի մասին, ՀՀԿ խմբակցության քարտուղար Հովհաննես Սահակյանն էլ ասում է, որ Հանրապետականը հաղթելու է ինքնուրույն և կարիք չունի անգամ ՕԵԿ-ի աջակցության:

Վերը թվարկված բոլոր հայտարարությունները տեղավորվում են ընտրական տեխնոլոգիաների շրջանակում:

Սակայն այս ամենն ընտրարշավի միայն տեսանելի կողմն են՝ այսբերգը:

Իրականության մեջ` ՀՀԿ-ի և անձամբ Տարոն Մարգարյանի նյարդերն արդեն տեղի են տալիս: Մարդկայնորեն սա հասկանալի է. դժվար է հեռուստացույցը միացնել ու լսել, թե ինչպես է առաջին նախագահը քեզ խամաճիկ անվանում կամ հանդուրժել քաղաքապետի ցանկացած գործողություն «իմիտացիա» բառով բնորոշող Վարդան Օսկանյանին: Երեկ հանրապետականներն որոշել են հակահարձակման անցնել, մանավանդ որ` Գագիկ Ծառուկյանն որոշել է խախտել նաև հայկական «ֆեոդալիզմի» օրենքները:

Գաղտնիք չէ, որ Հայաստանը բաժանված է մանր ու մեծ` վարչական բաժանման հետ կապ չունեցող տարածքների, որոնցից յուրաքանչյուրը վերահսկվում է տեղական ֆեոդալի կողմից: Օրինակ, Կոտայքի մարզը «նայում»  է մեր առաջին նախագահի սիրած օլիգարխը` Գագիկ Ծառուկյանը: Այդ մարզի հարևանությամբ գտնվում է Ավան համայնքը, որի «տերերն» են քաղաքապետ Տարոն Մարգարյանն ու դարձյալ օլիգարխ Ռուբեն Հայրապետյանը:

Երեկ Ծառուկյանն որոշել է բացահայտ ձեռնոց նետել Ավանի ֆեոդալներին` իր բարեգործական ավտոբուսները դնելով նրանց հպատակների տրամադրության տակ: Մի կողմ թողենք այն հանգամանքը, որ սրանով ԲՀԿ առաջնորդը հարվածում է Մարգարյանի և Հայրապետյանի բիզնես շահերին, որովհետև հենց նրանք են վերահսկում այս համայնքի հետ առնչվող երթուղային գծերը: Ընտրարշավի համատեքստում` Ծառուկյանի արածը նաև քաղաքական ենթատեքստ ունի, յուրօրինակ մեսիջ է ավանցիներին, որ` ես, ի տարբերություն` ձեր ֆեոդալների, բարեգործ եմ և տիրություն եմ անում ոչ միայն իմ, այլև` այլոց հպատակներին:

Տարոնի պատասխանը չի ուշացել. նա` իր նազիր-վեզիրների միջոցով, ակտիվ կանանց փողոց է հանել ու նրանց ուժերով գրողի ծոցն ուղարկել Ծառուկյանի ուղարկած ավտոբուսն էլ, բարեգործությունն էլ:

Փաստորեն, ընտրարշավը մեր օլիգարխների և պաշտոնյաների մոտ խթանում է բարեգործություն ու տեղական հայրենասիրությունը, թասիբը:

Այսպիսով` ընտրարշավը վերածվել է մարտի դաշտի` հակամարտ բանակներով: ՀՀԿ-ն և ԲՀԿ-ն գաղափարական տարաձայնություններ չունեն, ավելին` նույն համակարգի ծնունդ են ու այսօրվա նրանց կռիվը ծրագրերի համար չէ` ռեսուրսներին տիրանալու կռիվ է:

Նախարարության տաս տարիներին Վարդան Օսկանյանը միայն վարդագույն քաղաք է տեսել, իսկ հիմա ոչ միայն պրոբլեմները սկսել է նկատել, այլ նաև քաղաքային իշխանությանը մեղադրում է անգործության մեջ: «… Մենք հաճախ ենք ասում, որ երկու Երևան կա՝ Կենտրոնը և մնացածը: Ես կասեի, որ երկուսից շատ ավելի Երևան կա՝ Փոքր կենտրոն, Մեծ կենտրոն, Կենտրոն, մյուս վարչական շրջանները և դրանց ծայրամասերը: Սրանք բոլորը միմյանցից տարբերվում են: Տարբերությունը հսկայական է հատկապես Փոքր կենտրոնի և ծայրամասերի միջև: Երևանի հավասար և ամբողջական զարգացումն իսկապես այսօր քաղաքի առաջնային խնդիրներից մեկն է, և դրա իրականացման քաղաքականությունը ոչ թե պետք է լինի այն, ինչ առ այսօր եղել է՝ Կենտրոնից դեպի ծայրամասեր, այլ արդեն ճիշտ հակառակը՝ ծայրամասերից դեպի Կենտրոն… Մեր ժողովուրդն իրոք շատ բան չի պահանջում: Բայց մարդկանց խիստ զայրացնում է այն, երբ իշխանական շրջանակների ահավոր շռայլությունների պայմաններում մարդիկ չեն կարողանում ստանալ իրենց նվազագույն հասանելիքը: Այս մեկ շաբաթվա ընթացքում ես չեմ հանդիպել գոնե մեկ խնդրի, որը թեկուզ մեր այսօրվա ռեսուրսներով լուծելի չլինի>>,-իր ֆեյսբուքյան էջում գրում է նախկին պաշտոնյան` ներկայացուցիչը մի իշխանության, որի գործունեության հետևանքներից մեկն այսօրվա անհամաչափ ու անկանոն զարգացած Երևանն է:

Օսկանյանին շատ արագ հակազդել է հանրապետական պատգամավոր Արտակ Զաքարյանը, որի ֆեյսբուքյան էջում կարդում ենք. «…Եթե կան հստակ օրինակներ քաղաքապետարանի կողմից կատարվող կամայականությունների և արհեստական խոչընդոտների մասին, լավ կլիներ դրանք կոնկրետացվեին և վստահ եմ, որ իրականությանը համապատասխանելու դեպքում այն անհետևանք չի լինի: Մեր գործընկերները հաճախ են խոսում Երևանում քաղաքական մենաշնորհների մասին: Ժողովրդավարական հասարակարգում քաղաքական մենաշնորհներ չեն լինում: Միայն հաջողված քաղաքական կառավարման ու իրական քաղաքականության իրացմամբ է հնարավոր հասնել շոշափելի արդյունքների, որի գնահատողը մեր քաղաքացին է: Ուրեմն մեր քաղաքական գործընկերները լավ կանեն ոչ թե աշխատեն մեր դեմ, այլ աշխատեն հանուն մեր քաղաքացիների ու հանուն նրանց բարօրության: Վստահ եղեք, մարդիկ գնահատում են կատարված աշխատանքը և ոչ թե ինքնանպատակ քննադատությունները»:

Հանրապետական մեկ այլ պատգամավոր Կարեն Ավագյանի ֆեյսբուքյան գրառմանը չեմ անդրադառնա, որովհետև, ըստ երևույթին, նա փոքրատառերով հիշատակելով Օսկանյանին` որոշել է իր շեֆերի մոտ, մի փորձից՝ և «զաչոտը» ստանալ, և քննությունը:

Երեկ Տարոն Մարգարյանը շատ կտրուկ հակադարձել է Լևոն Տեր-Պետրոսյանին, որն իրեն խամաճիկ էր անվանել: «Ամեն մարդ, որ խոսում է, թող իր մասին առաջինը մտածի, հայելու մեջ նայի իրեն»,- Աջափնյակ համայնքում նախընտրական հանդիպման ժամանակ լրագրողների հետ զրույցում ասել է քաղաքապետը՝ պատասխանելով ՀԱԿ առաջնորդ Լևոն Տեր-Պետրոսյանին:

«Բարև Երևան» դաշինքի ընտրական ցուցակի վեցերորդ համար Դավիթ Սանասարյանը խոստացել է, որ իրենք շուտով կլքեն հեռուստաեթերն ու ակումբները և կվերադառնան հրապարակներ, բակեր` ակտիվ քարոզչության:

Այդ «շուտովը» դեռևս չեն հաստակեցրել նաև ՀՅԴ-ում ու ՀԱԿ-ում:

Դաշնակցական պատգամավոր Աղվան Վարդանյանը խոսել է կոնկրետ խախտման մասին. «Արդեն իսկ կան ահազանգեր տարբեր վարչական շրջաններից, որ տնօրենները ուսուցիչներին հրահանգավորում են և որպես քարոզիչներ ուղարկում են աշակերտների տները»:

Հետաքրքիր է, բայց` փաստ, որ ընտրակաշառքի մասին խոսել է գործող կաբինետի անդամ, ՕԵԿ քաղաքապետի թեկնածու Արմեն Երիցյանը: Եվ նույնիսկ դրա դեմ պայքարելու դեղատոմս է առաջարկել: «Ես գիտեմ, բերելու են փող են բաժանելու, ու էլ ինչեր են անելու: Այսօր տարբեր ձևեր ու մեթոդներ կան: Փողը կտան` վերցրեք, պրոբլեմ չկա. ոչ ոք ձեզ չի նկարում, ոչ ոք ձեզ չի տեսնում: Հարյուրը կտան, հարյուրից էլ վերցրեք, բայց ընտրեք այն մարդուն՝ ում վստահում եք»,- ասել է նա:

Այս թոհ ու բոհի մեջ, կարծես, օազիս լինի «Առաքելություն» կուսակցությունը, որի հետ ոչ ոք չի վիճում, որից այս ընտրարշավում ոչինչ կախված չէ: Նրանք բակերում իրենց բուկլետներն են բաժանում և քննադատում համատիրություններին:

Սուրեն Սուրենյանց