Քանի որ ՀՀ նախագահի ինագուրացիան տեղի է ունենում Ազգային ժողավի հատուկ նիստում՝ ԲՀԿ-ն չի քննարկել իր խմբակցության անդամների՝ նիստին մասնակցել-չմասնակցելու հարցը. յուրաքանչյուրը կայացրել է անհատական որոշում: Այս մասին քիչ առաջ «Վարկած» ակումբում հայտարարեց ՀՀ ԱԺ ԲՀԿ խմբացության անդամ Վահան Բաբայանը:

Հիշեցնենք, որ ապրիլի 9-ին, նախագահի երդմնակալության միջոցառմանը չէր մասնակցում ԲՀԿ նախագահ Գագիկ Ծառուկյանը, բայց նրա ղեկավարած խմբակցության մեկ տասնյակից ավելի պատգամավորներ մասնակցել են ԱԺ հատուկ նիստին:

Ավելին, ԲՀԿ խմբակցության անդամ, Երևանի ավագանու ընտրություններում ԲՀԿ խմբակցության երկրորդ համար Գուրգեն Արսենյանն ասել էր, որ Սերժ Սարգսյանին լեգիտիմ նախագահ է համարում: Չնայած լրագրողների բազմաթիվ հարցերին՝ այդպես էլ պարզ չեղավ, թե արդյո՞ք Բաբայանը կիսում է Արսենյանի տեսակետը: Պատգամավորը միայն ասաց, որ ապրիլի 9-ին փակվել է նախագահական ընտրությունների էջը և հավելեց. «Այսօր իրավիճակը հետևյալն է՝ հանրապետությունում ընտրվել է նախագահ: Այսինքն, մենք մի քիչ պրագմատիկ պետք է լինենք: Ես կարծում եմ, որ մեր հիանալի շանսը՝ երկրում փոփոխություններ կատարելու, դա՝  Երևանի ավագանու և քաղաքապետի ընտրություններն են»: Ըստ Բաբայանի՝ դա է փոփոխությունների տանող քաղաքակիրթ ճանապարհը:

Վահան Բաբայանն ընդգծեց, որ ապրիլի 9-ից հետո հասարակությունը հիասթափված է Րաֆֆի Հովհաննիսյանից: Թեև Հովհաննիսյանը հայրենասեր մարդ է, բայց քաղաքական հարթության մեջ նա ձախողվեց:  «Ժառանգություն» կուսակցությունը և իր առաջնորդ Րաֆֆի Հովհաննիսյանը չունեն քաղաքական հստակ օրակարգ և այդ օրակարգի բացակայությունն է, որ ժողվրդին հիասթափեցրեց և այդ պատճառով քաղաքական լուրջ կոնսոլիդացիա չեղավ»,- թեման եզրափակեց Բաբայանը: