Տեղի ունեցավ բախում ժողովրդի ու Ոստիկանության միջև, բայց ոստիկանները հատուկ «ինստրուկցիաներ» էին ստացել, որ փափուկ լինեն ու չկրակեն. նման կարծիք է հայտնել երգահան Ռուբեն Հախվերդյանն՝ անդրադառնալով երեկ՝ Բաղրամյան պողոտայում տեղի ունեցած դեպքերին:

«Մենք ունենք հումանիստ ոստիկանապետ, այդ բառը կարող է չակերտներով կամ առանց լինի: Սերժ Սարգսյանի երդմնակալությունը զվարճալի ներկայացում էր հիշեցնում, նրա բացակա հայացքը… Իսկ Րաֆֆիի ելույթը լավն էր, բայց ջուրը մի քիչ շատ էր»,-գտնում է Ռուբեն Հախվերդյանը:

Նրա խոսքով, ՀՀ նախագահի նախկին թեկնածու, «Ժառանգություն» կուսակցության ղեկավար Րաֆֆի Հովհաննիսյանը երեկ չպետք է դեպի Ծիծեռնակաբերդ երթ ու մոմավառություն կազմակերպեր:

Ըստ Ռուբեն Հախվերդյանի, ցույցերը շարունակվելու են, որովհետև այսպես երկար չի կարող դիմանալ ժողովուրդը:

«Սարսափելի արտագաղթ է: Մարդիկ սովից չեն փախչում, այլ գարշելի ստից: Հոգնել են նրանից, որ բոլորը քծնում են, միշտ մտածում են ինչ կարելի է ասել, ինչ՝ չասել: Րաֆֆին ազնիվ մարդ է, մի մարդ է, որը գործարքի մեջ չի մտել նախկին իշխանությունների հետ, ինչպես Սերժ Սարգսյանը, որը ուզում է էսօր կոռուպցիայի դեմ պայքարել: Ինքն իր դե՞մ պետք է պայքարի»,- ընդգծել է  երգիչը, և հավելել. «Ես կանգնել եմ Րաֆֆիի կողքին, որովհետև դեմ եմ եղել Սերժ Սարգսյանին: Սերժը հրաշալի մարդ է, բարի, ինձ էլ լավություն է արել, ինձ չէ, այլ երեխաներին՝ գրքի համար 30 հազ. դոլար է տվել: Բայց եթե ինձ լավություն է արել, ընտանիքս կոտորում է, ինչպե՞ս պետք է վերաբերեմ իրեն, դրանից հետո ինձ կարելի է երախտամոռ անվանե՞լ»: