«ԲՀԿ-ն երևանցու կողքին է, իսկ եթե ինչ-որ մեկը փորձի նեղացնել կամ վիրավորել ԲՀԿ-ականի, ապա դիտարկելու եմ իմ դեմ ուղղված վիրավորանք և վիրավորողը իմ հետ է գործ ունենալու»,- քարոզարշավի մեկնարկին հայտարարել էր ԲՀԿ նախագահ Գագիկ Ծառուկյանը: Հասկացողը հասկացել էր, թե ում է ուղղված այս հաթաթան: Հաթաթայի հասցեատերն էլ անմիջապես պատասխանեց՝ անուղղակի. hանրապետականները խոսեցին օրինական ընտրությունների անհրաժեշտության մասին՝ առանց անուն տալու ակնարկելով, որ ընտրակաշառք չեն հանդուրժելու: Տեսնո՞ւմ եք՝ ինչ արդար իշխող կուսակցություն ունենք, քնում-զարթնում արդար ընտրությունների մասին է մտածում:

Հանրապետականների ակնարկն էլ մյուս կողմը հասկացավ. արտերկիր մեկնեց: Ու այնպես ստացվեց, որ յուրայինների շրջապատում թագավորի համբավ ունեցող մարդը, կամա թե ակամա, չի կարողանալու պաշտպանել անգամ՝ այս փուլում իրենից հետո ամենակարևոր բհկ-ականին՝ ավագանու ընտրություններում կուսակցության ցուցակը գլխավորող Վարդան Օսկանյանին: Հավանաբար, իշխանությունները Ծառուկյանի հայտնի հայտարարությունից հետո հիշեցին, որ ԱԳ նախկին նախարարը ոչ միայն քաղաքապետացու է, այլ նաև՝ «փողեր լվացող» ու հրավիրեցին ԱԱԾ՝ հարցաքննության:

ՀՀԿ-ԲՀԿ դիրքային պատերազմը թվում էր՝ պետք է ավելի զգոն դարձներ Տարոն Մարգարյանի թիմին: Թվում էր: Բայց հենց առաջին նախընտրական հանդիպմանը, որ տեղի էր ունենում Մալաթիա-Սեբաստիա վարչական շրջանում, Տարոնով խանդավառված գործող ավագանու հանրապետական Նաիրա Նահապետյանը սայթաքեց, խճճվեց թվերի մեջ: Շատ էր ուզում գովել Տարոնին, հակառակը ստացվեց:

«Բարև Երևան» դաշինքի թիվ մեկ համարը՝ Արմեն Մարտիրոսյանը մոռացել է, որ դեռ շաբաթներ առաջ ինքն արդեն նշանակվել է Երևանի քաղաքապետ՝ Նոր Հայաստանի հիմնադիր Րաֆֆի Հովհաննիսյանի կողմից: Արմենն ու իր կուսակիցներն այս պահին ավագանու ընտրությունների պես մանր գործերով զբաղվելու ժամանակ չունեն. նրանք պատրաստվում են Նոր Հայաստանի ծնունդին ու բոլորիս համոզում են, որ այսօր, հենց այսօր սկսվելու է նոր թվարկություն:

Մյուս ընտրական սուբյեկտներն էլ առանձնապես ակտիվ չեն: ՀՅԴ-ն որոշել է առայժմ հրապարակներում չերևալ և տուն առ տուն մտնելով՝ վառ պահել մեր հոգիներում մարող հեղափոխական կրակը: ՀՅԴ Հայաստանի ԳՄ փոխներկայացուցիչ Արսեն Համբարձումյանն էլ հյուրընկալվել էր Արամ Աբրահամյանին և վստահ ասում էր՝ այս անգամ տեղամասերում թվանկարչություն թույլ չեն տալու: Բայց դե, դրսի փող տվողի ձեքը ո՞նց բռնեն՝ դեռ պարզ չէ:

ՀԱԿ նախընտրական ցուցակի երկրորդ համարը՝Զոյա Թադևոսյանն, ասում է, որ իրենց ծրագիրը մարդակենտրոն է: Չեմ էլ կասկածում, բայց մարդակենտրոնությունը դրոշ են դարձրել նաև նրանք, ովքեր մի քանի կոպեկով այդ նույն մարդուն գնում և նվաստացնում են, այդ նույն մարդուն տեղամասում ծեծում են՝ բռնաբարելով նրա արժանապատվությունը:

ՕԵԿ-ն երեկ հանգստանում էր. առաջին օրվա դոզան բավարար է մի քանի օրվա համար. ուժերը խնայել է պետք:

«Առաքելություն» կուսակցությունն այս ընտարարշավի Հրանտ Բագրատյանն է. մարդիկ դրել հաշվել են, որ մեկ տարում մայրաքաղաքի բյուջտային մուտքերը կարող են ավելացնել 10 միլիարդ դրամով: Բայց դե, ընտրություններում թրծված ընտրողն ասում է՝ այ ախպեր, քո 10 միլիարդից գոհ եմ, նաղդ իմ տաս հազարը տուր:

Տպավորությունն այնպիսին է, որ մեր քաղաքացիներին ընտրությունները չեն հետաքրքրում: Քարոզարշավի երկրորդ օրը քաղաքում միայն ՀՀԿ-ի, ԲՀԿ-ի և «Առաքելություն» կուսակցության նախընտրական պաստառներն էին:

Սուրեն Սուրենյանց