Երևանի ավագանու ընտրությունների քարոզարշավի առաջին օրը համընկավ Մայրության և գեղեցկության օրվա հետ:

Երևանի քաղաքապետարանի աշխատողները մայրաքաղաքի տարբեր հատվածներում կանանց և աղջիկներին ծաղիկներ էին բաժանում` Տարոն Մարգարյանի անունից: Լավ էլ անում էին. կանանց, մեր մայրերին արժևորել է պետք: Վատն այն է, որ ծաղիկները բաժանում էին քաղաքապետարանի աշխատակիցները, ոչ թե` Մարգարյանի շտաբի ներկայացուցիչները: Սա կարող է մրցակիցների կողմից որակվել որպես վարչական ռեսուրսի չարաշահում:

ԲՀԿ-ն էլ ծաղիկներ բաժանեց, բայց` սահմանափակ թվով, իր կին անդամներին` «Մոսկվա» կինոթատրոնում:

Քաղաքապետի ՀԱԿ թեկնածու Վահագն Խաչատրյանն էլ Սարյանի արձանի մոտ էր հրավիրել իրենց կուսակցության համակիր կանանց և արժևորում էր նրանց տոնը, հնգամյա պայքարը:

Ընտրարշավը դասական` արևտյան չափանիշներով, սկսեց «Օրինաց երկիր» կուսակցությունը: Կիրակի առավոտ կուսակցության անդամները` Արթուր Բաղդասարյանի գլխավորությամբ, հավաքվել էին «Մարիոթ» հյուրանոցում` ներկայացնելու իրենց ծրագիրը, համամասնական ցուցակը, քաղաքապետացուին: «Լավ տրամադրությամբ սկսում ենք այս օրը և լավ տրամադրությամբ ու հաղթանակով էլ կավարտենք»,- ավետեց Արթուր Բաղդասարյանը: Այս հավաքում Տարոնի մասին թթու խոսքեր չասեցին: Պահեցին իրենց` կոալիցիոն գործընկերոջը վայել, միայն ասեցին, որ իրենց թեկնածուն` ԱԻ նախարար Արմեն Երիցյանն, ավելի լավ քաղաքապետ կարող է լինել: Համ էլ` հատուկ շեշտվեց Երիցյանի երևանցի լինելը: Դե նա էլ այդ շեշտադրումն արդարացրեց. «Չկա մի այդպիսի տարածք , որտեղ կամ երաժշտությամբ կամ սպորտով չեմ զբաղվել: Տղաները կիմանան և կհիշեն, գնում ղայթան ու հոլ էինք խաղում, ծեծ էինք ուտում` ծեծում էինք: Ինչպես կասեր մեր Տիգրան Կարապետիչը` Զանգվի ջուր էինք խմում: Մենք պետք է ամեն ինչ անենք, որ Երևանը այնպիսին լինի, որ բոլորս տեսնենք և հպարտությամբ ասենք, որ սա մեր տունն է»,- ասաց նախարար, ՕԵԿ քաղաքապետացու  Արմեն Երիցյանը: Ընդհանրապես, Բաղդասարյանի և մյուս ելույթ ունեցողների հիմնական թեզն այն էր, որ Երիցյանն ամենամրցունակ թեկնածուն է: Այս բարձր տրամադրության ֆոնին, սակայն, շատ դժգույն ստացվեց ՕԵԿ մամլո քարտուղարի միապաղաղ ելույթը Հանրայինի քարոզչական բլոկում:

Այ, ՀՀԿ նախընտրական տեսահոլովակը` երգով, որի հեղինակը Արմեն Մարտիրոսյանն է, իսկ բառերը` Ավետ Բարսեղյանինը, բավականին տպավորիչ էր: Ափսոս` իրականությունից շատ տարբերվող: Քաղաքապետ Տարոն Մարգարյանը նաև քաղաքացիներին էր դիմել` ասելով, որ նրանց վստահության կարիքն ունի: Կայքերից մեկում զետեղված էր գործող քաղաքապետի հարցազրույցը, որում նա վիճահարույց միտք էր արտահայտել: «Մեր ծրագիրը քաղաքական չէ, ինչպես քաղաքական չեն ընտրությունները: Իսկ մեր միակ նպատակը երևանցու հարմարավետ և արժանապատիվ կյանքն է մեր բոլորիս կողմից սիրված քաղաքում: Եթե ոմանց համար նպատակը Երևանի վրա իշխելն է, ապա մեր նպատակը երևանցիները կյանքը թեթևացնելն է: Սա լուրջ և սկզբունքային տարբերություն է»,-ասում է Տարոնը: Քաղաքապետի կամ ավագանու թեկնածուի ծրագիրն իսկապես կարող է քաղաքական չլինել, բայց ընտրությունը, այն էլ` միայն կուսակցական սկզբունքով, միայն համամասնական ընտրակարգով, չի կարող քաղաքական չլինել, եթե նույնիսկ այդպես է ուզում մեր մայրաքաղաքի թիվ մեկ պաշտոնյան:

Քաղաքական-ոչ քաղաքական հարցում միանգամայն այլ կարծիքին են ԲՀԿ-ում: «Հիմա իշխանությունը փորձում է վերարտադրվել, քանի որ կարծում է, թե իշխանությունը ժառանգաբար է անցնում իրենց: Պետք է, ուրեմն, կոալիցիայից դուրս գտնվող քաղաքական ուժերի կոնսոլիդացիա լինի, այն թույլ չտալու համար»,– երեկ նշել է ավագանու ընտրություններում ԲՀԿ ցուցակը գլխավորող Վարդան Օսկանյանը։Կարծես թե. Օսկանյանը միտք է արտահայտում, որը ենթադրում է քաղաքական և հասարակական լայն կոնսոլիդացիա: Այս ֆոնին տարակուսելի է, որ ԲՀԿ ակտիվը` Գագիկ Ծառուկյանի գլխավորությամբ, իր նախընտրական առաջին հավաքն անցկացրեց կուսակցական նեղ շրջանակում. «Մոսկվա» կինոթատրոնի դռները փակ էին լրագրողների համար: ԲՀԿ-ում որոշողը ոչ Օսկանյանն է, ոչ էլ որևէ շտաբի պետ, այլ` բացառապես Ծառուկյանը: Նրա անձի վրա է հիմնված լինելու նաև այս քարոզարշավը. դրա վառ ապացույցն են կուսակցության առաջին օրվա տեսահոլովակը, այն, որ ուղերձով քաղաքացիներին դիմեց ոչ թե Օսկանյանն, այլ` Ծառուկյանը և այլն: «ԲՀԿ-ն երևանցու կողքին է, իսկ եթե ինչ-որ մեկը փորձի նեղացնել կամ վիրավորել ԲՀԿ-ականի, ապա դիտարկելու եմ իմ դեմ ուղղված վիրավորանք և վիրավորողը իմ հետ է գործ ունենալու»,- իշխանությանը զգուշացնում է ԲՀԿ առաջնորդը` մի պահ մոռանալով, որ ինքը նույնիսկ Երևանի քաղաքացի չէ:

Սակայն զարմացնելու առումով առաջատարը դարձյալ «Բարև Երևան» դաշինքն է, որը ձևավորվել է Րաֆֆի Հովհաննիսյանի շարժման շուրջ: Եկմալյան-Պուշկին փողոցների խաչմերուկին գտնվող պուրակում ծառատունկ կազմակերպելը` հիանալի է, մանավանդ որ` դա ունի իր բացատրությունը: «2007թ-ին երբ ես, Ստյոպան, Արմենը, Զարուհին պատգամավորներ էինք, ստացանք ահազանգ այն մասին, որ այս տարածքում մտել են բուլդոզերներ, մի խոսքով, հիմքեր են փորում, իսկ բնակիչները ուզում են պաշտպանել: էդ օրը շատ մեծ պատմություն եղավ: Տրակտորի դեմը փակեցինք, ոստիկանների հրմշտոց և այլն: Մեր ջանքերով ոչինչ չկառուցվեց այստեղ, և արդեն Գագիկ Բեգլարյանի քաղաքապետ լինելու ժամանակ ծառատունկ կազմակերպվեց»,-ասում է ծառատունկի գլխավոր հերոս Ր. Հովհաննիսյանը: Արտառոցն այն է, որ ծառատունկին չէր մասնակցում դաշինքի քաղաքապետացու Արմեն Մարտիրոսյանը, որը Գյումրի էր մեկնել` երեսուն գյումրեցիների քայլերթը դեպի Երևան կազմակերպելու համար: Գյումրեցիներն Երևան են գալիս` Հովհաննիսյանի երդմնակալությանը մասնակցելու համար: Ակնհայտ է, որ հենց «Ժառանգության» ղեկավարն է Մարտիրոսյանին Գյումրի գործուղել. կամ սրանով Հովհաննիսյանը ցույց է տալիս, որ իր թիմին քաղաքապետական ընտրությունները բացարձակապես չեն հետաքրքրում, կամ էլ` «ժառանգությունում» կադրային լուրջ դեֆիցիտ կա ու Մարտիրոսյանի վրա միանգամից մի քանի ֆունկցիա է դրված` քաղաքապետացու, հանրահավաք վարող, Գյումրիից մարդ ուղեկցող և այլն: Ինքը` Արմեն Մարտիրոսյանը, յուրօրինակ բացատրություն է տվել իրենց որոշմանը. «Այն հաղթանակը 70/30, որ պաշտոնական կար Գյումրիում, մենք այդ հաղթանակը այսօրվանից տանում ենք դեպի Երևան, որ ապրիլի 9-ին մենք մեկ անգամ ևս հաստատագրենք փետրվարի 18-ի հաղթանակը և մայիսի 5-ին այլևս պաշտոնական այս հարաբերակցությունը նաև Երևանում լինի»,-ասել է Արմեն Մարտիրոսյանը: Գեղեցիկ է հնչում, բայց Հանրային հեռուստատեսությամբ ցուցադրված տեսահոլովակում նույնպես ոչ մի խոսք չկար ավագանու ընտրությունների մասին:

Բոլորս հրավիրվում էինք «Նոր Հայաստանի» երդմնակալությանը:

«Առաքելություն» կուսակցությունը Հանրայինով ներկայացրեց իր տեսահոլովակը, որից իմացանք, որ նրանց հաղթանակի դեպքում` մետրոյից անվճար կերթևենք, քաղաքը երկու անգամ ավելի բյուջե կունենա և այլն: Ափսոս, որ ոչ ոք չի հավատում այս կուսակցության հաղթանակին:

ՀՅԴ-ն հետաձգել էր իր մեկնարկային տոնական միջոցառումները` Պռոշյանի գյուղապետ, դաշնակցական Հրաչ Մուրադյանի սպանության հետ կապված: Միայն որոշ կայքեր հրապարակեցին ՀՅԴ նախընտրական ծրագիրը:

 Սուրեն Սուրենյանց