Ինչպես ամեն անգամ նախագահական ընտրություններից հետո, հանրությունը պետական համակարգի թարմացում է սպասում, բայց ամենաառանցքային պաշտոնների հետ կապված` հանրությունը կատարյալ անորոշության մեջ է: Մանավանդ իր վերջին ասուլիսում Սերժ Սարգսյանը հայտարարել է, որ գոհ է կառավարության աշխատանքից, և եթե մարդիկ կատարել են իրենց առջև դրված խնդիրները, նրանց փոխելը սխալ է: Սակայն, այնուամենայնիվ, լուրեր են պտտվում, թե ոստիկանապետ Վովա Գասպարյանը շուտով նշանակվելու է պաշտպանության նախարար: Եվ ոստիկանապետի մտերիմներն արդեն տեղափոխության են պատրաստվում: Մինչև տարեվերջ ավարտվում է երեք բարձրաստիճան պաշտոնյաների պաշտոնավարման ժամկետը` գլխավոր դատախազ Աղվան Հովսեփյանի, Վերահսկիչ պալատի նախագահ Իշխան Զաքարյանի և Հեռուստատեսության և ռադիոյի ազգային հանձնաժողովի նախագահ Գրիգոր Ամալյանի: Թե ինչ է անելու Գրիգոր Ամալյանն ապրիլի 7-ից հետո, երբ ավարտվում է նրա լիազորությունների ժամկետը, հայտնի չէ, բայց երեկ նրան մեդալ են տվել` Լեռնային Ղարաբաղին մատուցած ծառայությունների համար: Թերթը նշում է, որ Ղարաբաղյան պատերազմի առաջին օրերից նա մասնակցել է մարտական գործողություններին և ներդրում ունի Պաշտպանության բանակի կայացման գործում: Նաև ակտիվորեն համագործակցել է ԼՂՀ տնտեսական հանձնաժողովի հետ և միջազգային հավաքների ժամանակ աշխատել է, որ ՀՀ պատվիրակության կազմում ներգրավվեն Արցախի ներկայացուցիչները:
Նույն շրջանակից նաև տեղեկացանք, որ վերևներում մտադիր են լուծարել Հեռուստատեսության և ռադիոյի ազգային հանձնաժողովը, քանի որ իր պատմական և ոչ պոպուլյար առաքելությունը` «Ա 1+»-ի փակումը, արդեն իրականացրել է և այժմ զբաղված է ոչնչով, որի համար բյուջեից հսկայական միջոցներ է կլանում: Վերջինիս ծախսերը վերահսկող մարմնի` Վերահսկիչ պալատի ղեկավարի լիազորությունները նույնպես տարեվերջին ավարտվելու են: Նոյեմբերին նախագահը, օրենքի համաձայն, Աժ-ին կառաջարկի Պալատի նախագահի թեկնածուին, որը կարող է կրկին Իշխան Զաքարյանը լինել, քանի որ օրենքն անձին թույլ է տալիս երկու անգամ անընդմեջ զբաղեցնել այս պաշտոնը:

Նկատի ունենալով, որ Զաքարյանը ճկուն գործիչ է, որը կարողանում է և «վերահսկել», և նորմալ հարաբերություններ պահպանել վերահսկվող «մոնստրների» հետ, նրա նկատմամբ ընդգծված դժգոհություններ չկան: Եթե անգամ Վերահսկիչի նախագահի պաշտոնը կոնսենսուսի շրջանակներում առաջարկվի ընդդիմությանը, քանի որ այն նշված էր Րաֆֆի Հովհաննիսյանի հավակնությունների ցանկում, կարելի է ենթադրել, որ ընդդիմությունն էլ դեմ չի լինի նրա թեկնածությանը, և Զաքարյանը կմնա խաղի մեջ: Նրա պաշտոնի հավակնորդներ չեն նշվում, բացառությամբ Զաքարյանի տեղակալ Լևոն Յոլյանի, որի անունը վերջերս հաճախ է շոշափվում կադրային փոփոխությունների կոնտեքստում: Յոլյանը հայտնի է որպես ՀՀԿ «գորշ կարդինալ»: Երեկ նա մեզ ասաց, որ լուրջ չի վերաբերվում այս խոսակցություններին: Երբ նրան զանգահարեցինք, ֆուտբոլ էր նայում և ասաց, որ չէր ցանկանա մեկնաբանել իր նշանակումների մասին անիմաստ խոսակցությունները:
Աշնանն ավարտվում է նաև գլխավոր դատախազի լիազորությունների ժամկետը: Սակայն վարկած կա, որ Հովսեփյանը լուրջ առողջական խնդիրներ ունի, որոնց պատճառով վերջերս ստիպված է եղել բուժվել արտերկրում, և ինչը կարող է խանգարել կրկին պաշտոնավարելուն, եթե անգամ հայտարարվի, որ Սահմանադրության հետ խնդիր չկա: Նրա պաշտոնի մի քանի հզոր հավակնորդների անուններ են շրջանառվում` Գևորգ Կոստանյան, Արթուր Բաղդասարյան, և երեկ ԶԼՄ-ներում հայտնվեց նաև Աժ պետաիրավական հարցերի մշտական հանձնաժողովի նախագահ Դավիթ Հարությունյանի անունը, որը, սակայն, հերքում է տեղեկությունը` պնդելով, թե դա հիմարություն է, և ինքը աչք չունի այս աթոռի վրա:

Հրապարակ