Ոստիկանությունը արձագանքել է «Հայկական Վարկած» էլ.օրաթերթում հրապարակված «SOS. այս հատվածում վրաերթերը կրում են պարբերական բնույթ» հոդվածին, որն էլ ի գիտություն մեզ դիմած   քաղաքացիների ներկայացնում ենք ամբողջությամբ.

 «Ձեր կայքէջում զետեղված «SOS. այս հատվածում վրաերթերը կրում են պարբերական բնույթ» վերտառությամբ հոդվածում բարձրացված հարցերի առնչությամբ Ճանապարհային ոստիկանությունը ուսումնասիրել է Ծովակալ Իսակովի պողոտայի 27 հասցեին  հարակից ճանապարհահատվածի երթևեկության կազմակերպումը:

Վերոհիշյալ հասցեից  Արգավանդի խաչմերուկ երթևեկության ուղղությամբ 300 մ հեռավորության վրա գտնվում է նորակառույց վերգետնյա հետիոտնային անցում, իսկ «Հաղթանակ»-ի կամուրջ երթևեկության  ուղղությամբ մոտ 400 մ առկա է հետիոտնային անցում, հետևաբար  հետիոտնային անցումները երկու ուղղությամբ գտնվում  են  հետիոտնային մատչելիության սահմաններում: Բացի այդ, Իսակովի պողոտայում սահմանված է 80 կմ/ժ  առավելագույն արագություն, սակայն հիշյալ հատվածում  սահմանված է 70 կմ/ժ առավելագույն արագություն, ինչպես  նաև ճանապարհը կահավորված է համապատասխան  ճանապարհային  երթևեկության  տեխնիկական միջոցներով, իսկ լուսացուցային օբյեկտի կիրառումը գտնում ենք ոչ  նպատակահարմար:

Միաժամանակ, ճանապարհատրանսպորտային  պատահարների վերլուծության արդյունքում պարզվել է, որ 2011-2012 թթ. ընթացքում  նշված ճանապարհահատվածում տեղի է ունեցել 4 ճանապարհատրանսպորտային  պատահար  /2 վրաերթ, 2 բախում/, որի հետևանքով 2 մարդ զոհվել և 2-ը` վիրավորվել են:

Իսակովի պողոտայում երթևեկության  ուղղությունները տարանջատված են «Նյու ջերսի» պահպանապատով, ուստի վրաերթերը տեղի են ունենում ոչ սահմանված վայրից փողոցը հատելու պատճառով:

 ՀՀ ոստիկանության ՀԿԼ վարչություն