Հայրենի` նախկին և ներկա որոշ օլիգարխ-պատգամավորների օտար լեզուների իմացությունը կամ այդ լեզուներով արտահայտած մտքերը, ժամանակ առ ժամանակ, զվարճացնում են «պատգամավորասեր»  հանրությանը, իսկ հետո դառնում նաև «թևավոր խոսքեր»:

«Հայկական Վարկած»-ին հասած տեղեկություններով, ԱԺ պատգամավոր, հայտնի գործարար Սամվել Ալեքսանյանից` Լֆիկ Սամոյից, հետաքրքիր պատմություններն անպակաս են: Լավատեղյակները պատմում են, որ նա բացարձակ չի տիրապետում ռուսերենին, և երբ գործնական նպատակներով գնում է Ռուսաստան (կամ այլ երկիր), անպայման իր հետ վերցնում է անձի, որը հայերենով արտահայտած իր մտքերը հասկանալի լեզվով` ճշգրտորեն կարող է փոխանցել ռուսախոս (կամ օտարալեզու) կողմին: Բայց մի անգամ այնպիսի անսպասելի, անակնկալ իրավիճակ է ստեղծվել, որ Լֆիկը համարձակվել է անձամբ արտահայտվել…

Տարիներ առաջ, հերթական անգամ, գործնական մի նախաձեռնությամբ,  Սամվել Ալեքսանյանն իր թարգմանիչ-ուղեկցորդի և շքախմբի հետ գնացել է Մոսկվա: Այնպես է ստացվել, որ Սամվել Ալեքսանյանի շուրջը հավաքված խումբը հանկարծ գրավել է տեղի միլիցիոներների ուշադրությունը:

Վերջիններս, երբ մոտեցել են խմբին` ինչ-ինչ կասկածահարույց հանգամանքներ պարզելու նպատակով, Լֆիկն անտեղի խառնվել է իրար ու կրակն ընկնել… Նա միանգամից սրտանց ցանկացել է բացատրել ոստիկաններին, որ ամեն ինչ նորմալ է, որևէ խնդիր չկա, բայց շտապողականությունից այնպես է խառնվել, որ թարգմանչի օգնությանը չի դիմել. երևի մտածել է, որ հենց միլիցիոներներին հայավարի դիմի «ախպեր ջանով», նրանք ամեն ինչ կհասկանան ու իրենց հանգիստ կթողնեն: Լֆիկը միանգամից հիշել է, որ ախպեր բառը ռուսերենով մի 4-5 տառանոց բառ է. անմիջապես «թարգմանել է», բայց փոխանակ ոստիկաններին ասի «բռատ», անվանել է (ներեցեք) «բլյատ…»: Էս մեր պատգամավոր եղբորը բռնել-տարել են ոստիկանության բաժին: Բայց քանի որ Լֆիկ Սամոն իրավապահներից խուսափելու ձևը միշտ գտնում է, այնտեղ մնացել է այնքան, մինչև  ոստիկաններն ի վերջո հասկացել են, թե ինչ բարեսիրտ տղա է հայ պատգամավորը և ինչքան մաքուր սրտով է իրենց ասել «բլյատ»…

Բայց, եթե Սամվել Ալեքսանյանը օտար լեզվին` ռուսերենին չի տիրապետում, դա դեռ ոչինչ, բայց պատգամավորներ կան` հայերենին էլ չեն տիրապետում:

Հիշեցնենք, որ մոտ երկու տարի առաջ էլ ԱԺ նախկին պատգամավոր Տիգրան Արզաքանցյանը չէր հասկացել «Երկիր» օրաթերթի` իր մասին գրած որոշ արտահայտություններ ու վիրավորվել էր. նա «պոզիտիվ» (որը նշանակում է դրական) բառը շփոթել էր սովորաբար սեռական հարաբերության ժամանակ գործածվող «պոզա» (դիրք, կեցվածք) բառի հետ ու այնքան էր անհարմար զգացել, որ լրատվամիջոցին դատի էր տվել… ու պարտվել: Դատարանում նրան բացատրել էին, որ ոչ թե այդ բառից, այլ ուրիշ բանից պետք է անհարմար զգալ…

Այնպես որ, հարգելի պաշտոնյաներ, մինչև բառի իմաստը չհասկանաք` ոչ արտահայտվեք, ոչ էլ այլ քայլի դիմեք. դա կարող է վնասակար լինել ոչ միայն հեղինակությանը, գրպանին, այլ նաև առողջությանը:

Անփորձանք…

Էլմիրա Մարտիրոսյան

 Հ.Գ.  «Պատգամավորաորսը շարունակվելու է» թեմայի շրջանակներում ահա ևս մեկ նյութ, որը ներկայացնում է մեր երկրի օրենսդիրներին:

Պատգամավորաորսը շարունակվելու է | Arm Version: