Մալաթիա-Սեբաստիա համայնքում կատարվող հերթական «հողազավթումը» կրկին կապվում է ԱԺ պատգամավոր Սամվել Ալեքսանյանի՝ Լֆիկ Սամոյի անվան հետ:

Լֆիկը, բլուրը փորելով, ուզում է «Փարոսին» հասնել:

Նախկին «տրամվի կռուգ» կոչվող վայրում, որը գտնվում է «Փարոս» ռեստորանի հարևանությամբ՝ բլուրի կողքին, արդեն մի քանի ամիս է, որ շինարարական ակտիվ աշխատանքներ են կատարվում՝ մեծ փոս է փորվում:

Վերջերս էլ այդ փոս փորելու գործընթացը ծավալվել է «Փարոս» ռեստորանի բլուրի ուղղությամբ և, կարծես թե, այն շարունակելու միտում ունի:

Բանն այն է, որ այս նախաձեռնության հեղինակը քանդել է տվել նաև ռեստորան տանող ճանապարհը՝ չգործող ռեստորանի տերերին զրկելով նաև իրենց սեփական տարածք մտնելու հնարավորությունից:

Իսկ սեփականատերերից մեկը նաև նախկին թաղապետ, երջանկահիշատակ Վահան Զատիկյանի հարազատներից է:

Հիշեցնենք, որ Վահան Զատիկյանը և նրա կրտսեր որդին՝ Անդրանիկ Զատիկյանը, մահացան կասկածելի հանգամանքներում, վերջինս՝ եղբոր սպանության «պատվիրատուի» գործով դատաքննությունից առաջ: Իսկ Վ. Զատիկյանի ավագ որդուն՝ Սեդրակ Զատիկյանին սպանել էին 2006-ին՝  ինքնաձիգի կրակոցներով:

Ըստ քրեական գործի անջատված մասով դատավճռի (կատարողների, օժանդակողների մասով)՝ սպանության պատվիրատուն ԱԺ նախկին պատգամավոր Լեդի Հակոբ մականունով հայտնի Հակոբ Հակոբյանի եղբոր որդին է՝ Ստեփան Հակոբյանը, ում վերաբերյալ դատավարությունը սկսվել է այս տարեսկզբին:

Ստացվում է, որ Վահան Զատիկյանի ընտանիքի երրորդ անդամի մահվան հանգամանքից ինչ-որ մեկն օգտվել է և այժմ սահմանափակում է սեփականատերերի՝ իրենց սեփականությունից օգտվելու իրավունքը:

Ըստ լուրերի՝ վերոնշյալ տարածքում ավտոմեքենաների վաճառքի մեծ սրահ է կառուցվում, ընդ որում՝ անօրինական, քանի որ չկա Երևանի քաղաքապետարանի կողմից տրված որևէ ցուցանակ, որից հնարավոր կլիներ՝ պարզել, թե որ ընկերությունը ինչ ժամկետներում և ինչ նախագծով է այդտեղ շինարարություն անում, և որը կհավաստեր նաև շինարարության՝ օրինական լինելու մասին:

Ըստ համայնքում պտտվող տեղեկությունների՝ չնայած Սամվել Ալեքսանյանը շատ լավ հարաբերություններ է ունեցել և ունի Զատիկյանների ընտանիքի հետ, այդուհանդերձ նրա այդ «արարքը« շատերը համարում են անազնիվ, անհարգալից վերաբերմունք՝ Զատիկյանների նկատմամբ:

Նաիրուհի Նանյան