Այն, որ պատմամշակութային կոթողներին վերաբերվող ցանկացած նախագիծ հարկավոր է դնել հանրային ու փորձագիտական քննարկման և որոշակի գործողություններ իրականացնելիս, անպայման պետք է հաշվի առնել հասարակության կարծիքները, փաստ է: Քանի որ մեր երկրում Մշակույթի նախարար Հասմիկ Պողոսյանը, և, մասնավորապես, վերընշված ոլորտը վերահսկող փոխնախարար Արև Սամուելյանն, առհասարակ, կապ չունեն մշակույթի հետ: ՀՀ Վարչապետի նախկին դիզայները՝ դառնալով մշակույթի փոխնախարար, ոչ միայն ամլացրեց դաշտը, այլև արեց այնպես, որ ոլորտի գիտակներն էլ են այսօր անցել ընդհատակ: Ոչ ոք ոչինչ չի ասում մեր հուշարձանների խայտառակ վիճակի մասին, չկան քննարկումներ, իրազեկումներ, ոլորտը դարձել է փակ գոտի:

Վերջերս հանցավոր տգիտության պատճառով Գառնիի՝ 11-րդ դարի միջնադարյան կամրջի ամրացման աշխատանքներից հետո, այն անհասկանալի տեսք է ստացել: Մեզ հետ զրույցում արվեստագետները նկատում են, որ այստեղ ակնհայտ է փնթի և ոչ պրոֆեսիոնալ մոտեցում գործին: Հաշվի չի առնվել ժամանակի գործոնը, և նոր «կարկատաները» փչացրել են կամուրջի պատմական արժեքը:

Այսօր տեղեկացանք, որ Մշակույթի նախարարության դիմաց Գառնու կամրջի հետ կապված կազմակերպվել էր բողոքի ակցիա. կամուրջը վերանորոգումից հետո ոչ շահեկան ձևափոխվել է:

Խնդրով մտահոգ են բնապահպան ակտիվիստները, որն ինչքան էլ ուրախալի, նույնքան հուսահատեցնող է, ի վերջո Գառնու կամուրջը նախևառաջ պատմական մշակութային արժեք է:

Ինչևէ, կամրջի վերաբերյալ ակտիվիստները հանրային հարցադրումներ էին ուղարկել մշակույթի նախարար Հասմիկ Պողոսյանին: Հուսանք, որ որոշ պարզաբանումներ կստանանք կամրջի «վերանորոգման» վերաբերյալ:

Ռ.Ավոյան