Մինչ  Ժառանգություն  կուսակցության  առաջնորդ   Րաֆֆի Հովհաննիսյանը  ՀՀ-ի մի շարք մարզերում շարունակում է  իր բարևարշավը, ՀՀ  իշխանություններն իրենց հերթին փորձում են եղած յուղոտ պաշտոնները մեջ — մեջ անել:

Չնայած դրան, պարտություն կրած շատ ու շատ մարզերում պատասխանատուները դեռ «տափ են արել», քանի որ վստահ են, որ ինչքան էլ Բաղրամյան 26–ին նկարած թվեր հրամցնեն, Սերժ Սարգսյանը մանրամասնորեն տեղյակ է ընտրությունների յուրաքանչյուր դետալից: Իսկ ակնհայտ պարտվածներն, առհասարակ, պետք է որ ընկճախտի մեջ լինեին, սակայն, պարզվում է, որ դա այնքան էլ այդպես չէ:

Շատերն են համոզված,  որ օրինակ էջմիածինցի գեներալ Մանվելն ու յուր գերդաստանը,   դժվար թե  աչքները գցեին այս կամ այն չինովնիկի աթոռին, հատկապես՝ նախագահական ընտրություններում ապահոված  ցուցանիշներից հետո, բայց արի ու տես, որ  մեր երկրում   երբեմն -երբեմն, իրոք, որ խիարը  թարս է բուսնում:

Ինչևէ, «Հայկական Վարկած»-ի իրազեկ աղբյուրների փոխանցմամբ, պորտֆելաբաժանության  հողի վրա մի քանի օր է, ինչ  խոլ պատերազմի երկրորդ ռաունդն   է սկսվել գեներալ   Մանվել Գրիգորյանի ու Արմավիրի մարզպետ Աշոտ Ղահրամանյանի   թիմակիցների   միջև:

Բանից պարզվում է, օրերս  գեներալներից մեկի կազմակերպված խնջույքի ժամանակ,   գեներալ Գրիգորյանը  բավականին հետաքրքիր հայտարարություն է արել, ինչն էլ Ղահրամանյանի ականջն ընկնելուց հետո, բուռն քննարկումների ու շահարկումների տեղիք է տվել:

Ասում են, գեներալ Գրիգորյանը սեղանակիցների ներկայությամբ ասել է, որ Արմավիրի  հաջորդ մարզպետը  իր քաղաքապետ  որդի`Կարեն   Գրիգորյանն է լինելու,  քանի որ ներկայիս մարզպետ Աշոտ Ղահրամանյանը  մարզպետ աշխատելու փոխարեն, այդ մարզում կես դրույքով նաև հարկայինի պետ է աշխատում:

Այժմ, երկու կողմում էլ, ըստ մեզ  հասած լուրերի, իրավիճակը պայթյունավտանգ է դարձել, չնայած որ,  ամենավերին օղակներից  հրահանգված է առայժմ զսպվածություն դրսևորել, մինչև որ Րաֆֆին կհանդարտվի ու ամեն բան իր ճիշտ տեղը կընկնի: Տեսնենք…

Արամ Վարդանյան