Երեկ Հանրապետական կուսակցության գործադիր մարմնի նիստը գրեթե ամբողջությամբ նվիրված է եղել  Երևանի ավագանու ընտրություններին առնչվող հարցերին:

Որոշվել է, որ Երևանի ավագանու ընտրություններում համամասնական ցուցակի առաջին հորիզոնականը մնում է անփոփոխ. Տարոն Մարգարյան, երկրորդ հորիզոնականը զբաղեցնելու է միջազգային գրոսմաստեր, աշխարհահռչակ շախմատիստ Սմբատ Լպուտյանը, իսկ երրորդը՝ պրոֆեսոր, ճարտարապետ, Երևանի ճարտարապետության և շինարարության պետական համալսարանի  ռեկտոր Հովհաննես Թոքմաջյանը:

Սա կարող է նշանակել երկու սցենար, կամ կրկին որոշվել է, որ մայրաքաղաքը վստահվում է Տարոն Մարգարյանին, որը շատ ձեռնտու ֆիգուր է իշխանությունների համար, ինչքան էլ նրա մասին երևանցիները տարակարծիք են ,և ցուցակը կառուցվելու է Մարգարյանի գերազանցությունը շեշտելու միտումով, այսինքն հաջորդ հորիզոնականներում քաղաքական դեմքեր չընդգրկելու պահը հենց ասել կուզի, որ սա է մեր վերջնական առաջարկը:

Կամ երկրորդ վարկածը՝ ավագանու թիվ մեկ անդամի՝ քաղաքապետի  համար առաջիկայում հնարավոր են ինչ –ինչ պայմանավորվածություններ և այս պահին Տարոն Մարգարյանին թողնելը տեղում հենց այդ ենթատեքստում է: Այս դեպքում փոփոխությունը մեկ այլ թեկնածուով, որին կնախորդի ներկայիս քաղաքապետի պարտությունը ընտրություններում, ավելի տրամաբանական կլինի:

Ի դեպ, Շարմազանովը երեկ ասել է, որ ամբողջական ցուցակը կհրապարակվի օրենքով սահմանված ժամկետում, իսկ առաջին երեք հորիզոնականները չեն վերանայվի: