Այսօր ՎԱՐԿԱԾ ակումբում հոգեբան, Մանկավարժական համալսարանի «Զարգացման և կիրառական հոգեբանության» ամբիոնի վարիչ Սամվել Խուդոյանը նշեց, որ այս հետընտրական վիճակը հարաբերականորեն ավելի մեղմ է, քան 2008-ին:
Ըստ հոգեբանի, դա պայմանավորված է լիդերների դիրքորոշումներով, տրամադրվածությամբ՝ Րաֆֆի Հովհաննիսյանի կողմից ծայրահեղական քայլեր չեն սպասվում:

«Բայց դա չի նշանակում, որ ժողովրդի մեջ դժգոհությյունը քիչ է: Իմ կարծիքով բավականին մեծ է, դա նոր ծնված դժգոհություն չէ, և եթե հրահրողները փորձեին սրել իրավիճակը, անպայման կհաջողվեր՝ հնարավոր է ոչ նույն մասշտաբով, բայց կլիներ: Քանի որ կան մարտի մեկի դեպքերը, զգուշավորություն կա նաև իշխանությունների կողմից»,- ընդգծեց Խուդոյանը:

Նրա խոսքով, շատ կարևոր է, թե Րաֆֆի Հովհաննիսյանն ու ընդդիմությունը ինչքանով կարող են միավորվել և ստեղծել հզոր ընդդիմություն՝ սահմանադրական ճանապարհով փոփոխություններ անել, որոնք կվերացնեն սոցիալական անարդարությունը:

Սամվել Խուդոյանը տեսակետ հայտնեց, որ ժողովուրդն ուժ է և դժվար էր պատկերացնելը, թե այդ ուժը կկանգնի Րաֆֆի Հովհաննիսյանի կողքին:

Անդրադառնալով դասադուլներին, հոգեբանը, կարծիք հայտնեց, որ սա ոչ թե դասադուլ է, այլ աշխատանքից փախչելու միջոց է.«Հենց միայն այն փաստը, որ նրանք իրենց բողոքի ակցիան դասերից հետո չկազմակերպեցին, արդեն իսկ վկայում է այն մասին, որ սա դասադուլ չէ, այլ դասերից հրաժարվել է: Սա ուսանողաքաղաքական շարժում չէ, այլապես պետք է օրեցօր շարունակվեր, պետք է ստորագրահավաքներ անեին, և ոչ թե գնային ուրախանալու»,-նկատեց հոգեբանը: