Մարդու իրավունքների եվրոպական դատարանի կողմից «Գրիգորյանն ընդդեմ Հայաստանի», «Անտոնյանն ընդդեմ Հայաստանի», «Սեֆիլյանն ընդդեմ Հայաստանի» և «Վիրաբյանն ընդդեմ Հայաստանի» գանգատներով վճիռների պահանջները կատարելու նպատակով ՀՀ պետբյուջեի պահուստային ֆոնդից այս տարվա առաջին եռամսյակում արդարադատության նախարարությանը կհատկացվի 42 հազար 555 եվրոյին համարժեք ՀՀ դրամ:

Հայաստանի Հանրապետությունը նշված գործերով դիմումատուներին պարտավոր է վճիռներն օրինական ուժի մեջ մտնելուց հետո երեք ամսվա ընթացքում վճարել`«Գրիգորյանն ընդդեմ Հայաստանի» վճռով` 2,500 եվրո, «Անտոնյանն ընդդեմ Հայաստանի» վճռով՝ 3,000 եվրո, «Սեֆիլյանն ընդդեմ Հայաստանի» վճռով՝ 6,055 եվրո և «Վիրաբյանն ընդդեմ Հայաստանի» վճռով՝ 31,000 եվրո: Այս մասին տեղեկանում ենք կառավարության նիստի օրակարգից:

Արդարադատության նախարար Հրայր Թովմասյանը ՀՀ կառավարությունից գումար ստանալու անհրաժեշտությունը հիմնավորել է` «Կառավարման մարմինների գործունեության հետևանքով առաջացած վնասվածքների կամ վնասների վերականգնում» հոդվածով, ինչին ֆինանսների նախարարը չի առարկել: