Այսօր ՎԱՐԿԱԾ ակումբում «Ղարաբաղ» կոմիտեի հիմնադիր  անդամ  քաղաքագետ Աշոտ Մանուչարյանն, անդրադառնալով երեկ Արկադի Տեր- Թադևոսյանի կատարած  այն հայտարարությանը, թե Լևոն Տեր-Պետրոսյանը ցանկանում էր խաղաղ ճանապարհով Ղարաբաղը թողնել Ադրբեջանի տարածքում, և ողջ իշխանությունն աշխատում էր այդ ուղղությամբ, նշեց, որ առաջին անգամ չէ, որ այս կամ այն քաղաքական ուժերը փորձում են օգտագործել Արկադի Տեր-Թադևոսյանին, որպեսզի գործողություններ կատարեն երկրի դեմ:

«Ես մի քանի անգամ Արկադի Իվանիչին զգուշացրել եմ այդ մասին, և ցավալի է, որ այս անգամ ևս քայքայիչ գործողությունը երկրի դեմ իրականացվել է Արցախյան շարժման 25-րդ տարեդարձի օրոք»,-ընդգծեց Մանուչարյանը:

Ըստ նրա, քայքայիչ գործողությունը այն է, երբ մոտ 6 ամիս առաջ Կոմանդոսը հիշատակում էր մեկ անուն, իսկ հիմա անունները շատացել են, այդ թվում Աշոտ  Բլեյանի անունը:

Մանուչարյանն ասաց թե չի  հասկանում, թե ինչ կապ ունի Բլեյանը օպերացիաների հետ, բայց, նրա խոսքով, ով ստեղծել է այդ գործողությունը, այլ նպատակներ ունի ժողովուրդի հետ կապված:

«Հայաստանը երբևիցե որևէ տեղ հեռագիր չի ուղարկել: Դուք չեք գտնի որևէ թուղթ, որևէ հրահանգ, որը կվկայի, թե Հայաստանը ինչ-որ ձևով միջամտել է Արցախյան պատերազմի գործողություններին: Ես կարծում եմ` հեշտ է պարզել, թե ով է  հանրապետության դեմ պատրաստում այս քայքայիչ գործողությունները,  ով է անում դա, և ով է պահանջում դրսից»,-ասաց քաղաքագետը:

Մանուչարյանն առաջարկում է ստեղծել որևէ փակ հանձնախումբ և ծանոթանալ տվյալ ժամանակի փաստաթղթերի հետ, այդ ամենից հետո, պարզել, թե ով է հրահանգել Հայաստանի լրատվամիջոցներին կեղծիքը եթերով հեռարձակել, ըստ քաղաքագետի, թույն ներշնչել ժողովրդին:

Նրա խոսքով, Արցախյան շարժումը դարձավ ինքնուրույն երևույթ, որի շնորհիվ մենք ստեղծեցինք կառավարման  ֆունդամետալ նոր համակարգ:

Տարիներ առաջ, երբ Մեղրիի տարբերակն էր իրագործվում Հայաստանում, ևս մեկ այդպիսի քայքայիչ գործողություն կազմակերպվեց, և, Աշոտ Մանուչարյանի համոզմամբ, Արկադի Իվանիչը ներքաշվեց այդ գործի մեջ:  «Ես առաջին անգամ եմ լսում, որ ՀՀ նախագահը փոխգնդապետի հետ ինչ-որ բան քննարկի: Նման բան չկա, մեր սրբությունները պղծում են, քաշում են մեզ  քայքայիչ գործողությունների մեջ.  քաղաքականությունից  հեռու  մարդ է Կոմանդոսը»:

«Հայկական Վարկած»-ի այն հարցին, թե ինչը կարող էր դրդել նման հայրենասեր, այդպիսի հարուստ կենսագրություն ունեցող մարդուն դիմել այդ քայլին, Մանուչարյանը հստակ պատասխան չտվեց:

Անդրադառնալով հետընտրական իրավիճակին, Աշոտ Մանուչարյանը նշեց, որ կա ժողովուրդի համընդհանուր ընդվզումը՝ ընդդեմ այս համակարգի:Ըստ նրա իշխանությունն էլ է լարված, սակայն ժողովուրդն առանց օգնության, ոչինչ չի կարող անել:

Նա հիշեցրեց, որ 2003 թվականի ընտրությունից  հետո, իր վրա նախաձեռնություն վերցրեց մի չեզոք մարմին՝ «Մտավորականության ավագանի» անվամբ, որի մեջ մտնում էին Սիլվա Կապուտիկյանը, ՕՀան Դուրյանը, ակադեմիկոս Ղազարյանը և այլոք:

«Նրանք քաղաքական ուժերին հրավիրեցին և ասացին, որ երկիրը չի կարող այս վիճակում մնալ, առաջարկեցին լուծման ուղիներ», — պատմեց Մանուչարյանը:

«Հայկական Վարկած»-ի այն հարցին, թե մեր ժամանակներում կան այդպիսի մտավորականներ կամ մշակությանին գործիչներ, բանախոսը կրկին դժվարացավ պատասխանել: