Ով մինչև 6-ը չգա այստեղ և ժողովրդից ներողություն չխնդրի, նա պատասխան է տալու. նման հայտարարություն է արել «Ժառանգություն» կուսակցության առաջնորդ Րաֆֆի Հովհաննիսյանը՝ Ազատության հրապարակում ընթացող  հանրահավաքի ժամանակ: «Նախագահից սկսած՝ վարչապետ, ԱԺ նախագահ, պատգամավորներ, մարզպետ, սպա՝ հրամանատար…ըստ սահմանադրության, ով յուրացնում է ժողովրդի իշխանությունը, նա հանցագործ է և սահմանադրությամբ պետք է պատասխան տա»,-իր խոսքում նշել է Րաֆֆի Հովհաննիսյանը:

Նա ժողովրդին դիմելով՝ հարցրել է, թե պատրա՞ստ են արդյոք մինչև հաղթանակ պայքարի, թե՞ կարճ՝ «1-2 ժամանոց» հանրահավաք են ուզում, և երկարաժամկետ պայքար պատասխանը ողջունելով ասել է. «Ես էլ եմ պատրաստ»։

Րաֆֆի Հովհաննիսյանը տեղեկացրել է, որ կրկին կխոսի ժամը 18-ին և կանդրադառնա իր առաջարկին՝ ուղղված Սերժ Սարգսյանին, և հավելել, որ իրենց կմիանան նաև Նիկոլ Փաշինյանը, Կարապետ Ռուբինյանը:

———-

Քիչ առաջ Րաֆֆի Հովհաննիսյանը  նոր հայտարարել է, որ գիշերելու են Ազատության հրապարակում և այնտեղ էլ դիմավորելու են Սերժ Սարգսյանին:

Հանրահավաքին է միացել նաև Նիկոլ Փաշինյանը: Նրա խոսքով, ինքը ոչ թե «Րաֆֆի Հովհաննիսյանի և նրա թիմի» անդամ է, այլ «մեր ժողովրդի թիմից է»:

«Ազատության հրապարակում հավաքվածների խնդիրն այսօր պարզ է և հստակ։ Այն է՝ դե ֆակտո հաղթանակը վերածել դե յուրե հաղթանակի»,-նշել է Նիկոլ Փաշինյանը։

———

Րաֆֆի Հովհաննիսյանը գիշերը կանցկացնի Ազատության հրապարակում: Նա բարի գիշեր է մաղթել հավաքվածներին, վաղը ժամը 13.00-ին հանդիպելու ակնկալիքով:

Նա տեղեկացրել է, որ հենց վաղն էլ Ազատություն հրապարակում կհանդիպեն Սերժ Սարգսյանին: