ԵՏԸՆՏՐԱԿԱՆ

Հենց էն գլխից, որ ՀՀԿ Սիսիանի նախընտրական շտաբը կոնկրետ շտաբի պետ չունեցավ, արդեն նախադրյալ էր Սիսիան քաղաքում ՀՀԿ-ի պարտության  և նրա` նախագահի  թեկնածուին դժվար տրված հաղթանակի համար:
(Գյուղական համայնքները դուրս ենք դնում խնդրո առարկայից, քանի որ այնտեղ այլ մոտիվացիաներ են «աշխատում»):
Ենթաշտաբերի պետեր նշանակելով, ընդ որում, մարդկանց, ովքեր երբեք բարեհաճ չեն եղել միմյանց նկատմամբ, ընդհանրական պատասխանատվությունը մասնատվեց` այն տեղափոխվելով  անհատական տիրույթ: Թեև բոլոր ենթաշտաբերի պետերն էին, իսկապես, ջանում իրենց հանձնառության տակ գտնվող տեղամասում ապահովել առավելագույն ձայներ` «ցուցակային» ջանադիր աշխատանքով, վերջնական արդյունքը եղավ այն, ինչ եղավ. ՀՀԿ Սիսիանի նախընտրական շտաբը արձանագրեց ոչ այնքան բարձր արդյունք` ՀՀ նախագահի թեկնածու Սերժ Սարգսյանի օգտին քվեարկած` 3690 ձայների քանակով:
Թեև, ինչպես ասում են, 51,59 %-ը վատ չուցանիշ չէ, բայց` բավարար չէ գործող նախագահի պարագայում, և այն պարագայում, երբ սիսիանցիները ընդունում են Սերժ Սարգսյանին և ավելի շատ ձայն կտային նրան, եթե նրան «օգնողները» կողքից այդքան շատ չխանգարեին…
Իսկ այն, ինչ արձանագրվեց, միայն` մեծ ջանքերի գնով:
Սպասելի՞ էր ՀՀԿ Սիսիանի նախընտրական շտաբի այս ձախողումը:
Թերևս:
Փորձենք հիմնավորել:
Նախ` «աչքաբաց» է դարձել ինքը` ընտրողը: Արտաքուստ առճակատման և հակադրվելու տրամադրություններ չցուցաբերելով իրեն «ցուցակագրողների» հանդեպ, ընտրողը «խղճի հետ զրույց արեց» միայն քվեախցիկում:
Հասարակ, շարքային և կորցնելու ոչինչ չունեցող ընտրողը հրաշալի գիտակցեց, որ այն ջանքը, որ ներդնում են «շտաբիստները» և «ցուցակագրողները», միայն իրենց դիրքն ու պաշտոնը ամրապնդելու համար է, որից որևէ կերպ և Սիսիանում, և իրենց կյանքում ու միջավայրում դրական որևէ փոփոխություն չի կատարվում:
Ավանդաբար լինելով պետականամետ և երկիրը, հողը սիրող, սիսիանցին շարունակ իրեն և իր քաղաքը դուրս մղված է տեսնում երկրի և մարզի քիչ թե` շատ զարգացումներից և շարունակում է Սիսիանը ընկալել ու գնահատել որպես ամենախեղճ, ամենանանտեսված, ամենազուրկ բնակավայրը և քաղաքը, և ընտրության հետ է փորձում կապել որևէ փոփոխության հույս:
Չենք բացառում նաև, հատկապես` վերջին շրջանում, Սիսիանի քաղաքապետի, Սյունիքի մարզպետի, պատասխանատու պաշտոններ զբաղեցնող ՀՀԿ-ի մյուս շտաբիստների գործունեությունը և վարքագիծը լուսաբանող աղմկահարույց հրապարակումների` ընտրողի գիտակցության վրա թողած ընդգծված բացասական ազդեցությունը ՀՀԿ-ի և նրա շտաբի հանդեպ:
Կարծում ենք, որ ՀՀԿ Սիսիանի նախընտրական շտաբի պարտությունը և ՀՀԿ նախագահի թեկնածու Սերժ Սարգսյանի` Սիսիանում հավաքած ձայների` ոչ այդքան մխիթարող քանակը  մտահոգիչ քննարկման առարկա կդառնա համապատասխան ատյաններում` լրջագույն վերաբերմունքի և գնահատականի արժանացնելու այն իրողությունը, որը առկա է սիսիանյան հանրային ու համայնքային կյանքում:
Խնդրի` ներքին ու ցավոտ կողմը.

Այն, որ Սիսիանն, իսկապես, անտեր է բառի բուն և փոխաբերական իմաստով, սիսիանցիները վաղուց չէին վիճարկում:

Այն, որ Սիսիանը լուրջ լիդերի և սրտացավ տիրոջ կարիք ունի, նույնպես անվիճարկելի է Անվիճարկելի է նաև այն կարծիքը, անգամ` «յուրային» ճամբարում, որ առկա է Սիսիանի քաղաքապետի նկատմամբ, քանի որ «ճամբարափոխի», «դասալիքի», ԲՀԿ-ով իշխանության գալու պարագայում` նաև` ԲՀԿ-ին և նրա լիդեր Գագիկ Ծառուկյանին «քցելու» գնով ՀՀԿ-ի շվաքի տակ տեղ ապահովողի նրա վարքագիծը և ՀՀ քր. օրի 308 հոդվածի 1-ին կետի շրջանակներում շրջանառվող նրա անունը իր հանդեպ որևէ վստահություն չի ներշնչում:
Քաղաքական, բարոյական այս կոնտեքստում, իհարկե, այս հանգամանքը չէր կարող դուս մնալ և դուրս չմնաց սիսիանցիների տեսադաշտից` բացասաբար անդրադառնալով ընտրությունների արդյունքների վրա` ի վնաս ՀՀ նախագահի թեկնածու Սերժ Սարգսյանի:
Դեռևս չհաղթահարած և չհանդուրժած նրա` Սիսիանում կրկին քաղաքապետ նշանակելու անազնիվ քաղաքական խաղերի և դրա հետևանքների հետ, սիսիանցիները հերթական անգամ առիթ ունեցան խորապես խորշանքով լցվելու ԲՀԿ-ի` որևէ թեկնածուի չսատարելու հայտարարությունը արհամարհող և անտեսող ու միայն սեփական հավակնություններով այս կյանքում առաջնորդվող և նույն այդ նպատակներով Սերժ Սարգսյանին «սատարող» Աղասու հանդեպ:
Եվ քանդրտված ու ցեխոտ փողոցներով ընտրատեղամասեր մտնող ցեխակոլոլ կոշիկներով սիսիանցիները հազիվ թե «հանուն» իրենց «ճամբարափոխ» ու «դասալիք» քաղաքապետի` հարգեին նրա` Սերժ Սարգսյանին ձայն տալու «ինքնամոռաց» ջանքները: Մինչդեռ` խոստացել էր սիսիանցի 6500 ընտրողներից «ապահովել» 6 հազար ձայն` Սերժ Սարգսյանի օգտին: Բայց, չկարողանալով հաղթահարել «փառասիրական սինդրոմը» և իրեն վերագրելով ԱԺ ընտրությունների ժամանակ Սիսիանում Գագիկ Ծառուկյանի և ԲՀԿ-ի ստացած ձայները, նույն ընտրություններում` Թաթուլ Հակոբյանի` համասիսիանյան հաղթանակը, և մեծ պայքարի և ջանքերի գնով հասնելով  իր «ամենահզոր»` Գայի  թաղամասի  ենթաշտաբի պետի պաշտոնին` չկարողացավ նախագահին արժանի  բավարար ձայներ ապահովել այն դեպքում, երբ տնով-տեղով, ամբողջ ցեղով, խնամի-փեսայով առավոտից իրիկուն «պաշարել էին» ոչ պակաս յուրային` թիվ 2 մանկապարտեզի շենքը, որտեղ տեղակայված էր 37/15 ընտրատեղամասը:
Բա` ո՞ւր էր Թաթուլ Հակոբյանի` Սիսիանում ստացած ձայների էն 83 %ը, որ հոխորտում էր, թե` «ինքն է այդ ձայները ապահովել, Թաթուլը 83 %-ոց տղա՞ է…»…Ի՞նչ է` Սերժ Սարգսյանը «արժանի՞ չէր» …այդ պատվին:
Ընտրությունները ավարտվեցին: Սերժ Սարգսյանն այլևս  երկրի նոր նախագահն է:
Տեղամասերը փակվել են, և յուրաքանչյուրը վերադարձել է «ապահով Հայաստան» կառուցելու իր գործին:
Իսկ Սիսիա՞նը: Իսկ` սիսիանցի՞ն: Իսկ «բազմակուսակցական» Աղասի՞ն:
ԲՀԿ—ին ու Ծառուկյանին «քցել է», ՀՀԿ—ն կարիք չունի այլևս «ծախուներին» լծել «Ապահով Հայսատանի» իր կառքին, որովհետև «քցողի» խասյաթը գեշ է, չի փոխվում…
Ի՞նչ պիտի անի խեղճը: Օրեր առաջ համ ՀՀԿ էր, համ` ԲՀԿ էր, համ` ՀՀԿ ենթաշտաբի պետ էր, համ` մարզպետի հետ էր…
Հիմա`ո չ ՀՀԿ է, ոչ` ԲՀԿ է, ոչ` ենթաշտաբի պետ է, ոչ`…
Նրան մնացել է միայն քաղաքապետի` կրախի ենթարկվածի կարգավիճակը…

Որոտան. am