Թվում էր` գարնանային ԱԺ նստաշրջանը չի մեկնարկի` քվորում չլինելու պատճառով:

Ազգային ժողովի «մութ ձորերի» կարգն է էդպես. նախագահական-պառլամենտական ընտրությունների ժամանակ ԱԺ-ում` որպես օրինաչափություն, քվորում չի լինում:

Ավելին, նախորդ օրը մի նեղ միջավայրում ինքը` անձամբ Հովիկ Արգամիչն է ասել` դժվար նիստ լինի: Եվ դա այն դեպքում, որ անձամբ ինքն է պատասխանատու ԱԺ աշխատանքների, նիստերի կազմակերպման, պատգամավորներին սաունաներից, ռեստորաններից, կազինոներից «բերման ենթարկելու» գործում: Նամանավանդ, որ նախընտրական այս շրջանում ոչ ինքը և ոչ էլ իր հարգարժան -օրենսդիր` «սաունիստ-կազինոիստ» կոլեգաները ոչ մի բանով զբաղված չեն. նրանք կազինոներում, «նանարների» նուրբ ընկերակցությամբ, կրում-կրվում են, «ա սլուժբա իդյոտ». Սերժ Սարգսյանը միայնակ քարոզարշավ է իրականցնում:

Ու սա միակ կազուս չէ Հովիկ Աբրահամյանի մասով: Կարելի էր հասկանալ` «նեղ միջավայրում» մեսիջ էր հղվում, որ էնքան էլ կարևոր չէ, որ պառլամենտը կաշխատի, թե` ոչ, հետն էլ նույն այդ «նեղ միջավայրին» էր ասվում` «կարաք և նիստի չգաք»:

Բա էլ ուրիշ ինչպե՞ս հասկանալ: Երբ պառլամենտի աշխատելը Պարույր Հայրիկյանի դեմ կատարված մահափորձից հետո ստեղծված քաղաքական ֆորս — մաժորային վիճակում օդի-ջրի պես պետք էր նույն իշխանություններին: Ասել է` Սերժ Սարգսյանին, այն պարզ պատճառով, որ պառլամենտի անգործությունը, քվորում չապահովելը միանշանակ ֆիքսում էր, որ իրավիճակը իշխանությունները չեն կարողանում վերահսկել:

Եվ, վերջապես, անհնար էր, որ Հովիկ Արգամիչը չիմանար, որ վերջապես յուր խնամի Գագիկ Նիկոլայիչը նույնպես՝ «առաջին անգամը լինելով», ժամանելու է պառլամենտ:

Ինչպես էր պնդում, թե՝ «կարող ա նիստ չըլնի»: Չէ՞ որ, եթե գալիս է «պաստորը»` Ծառուկյանը, բոլոր «աշակերտները»` ԲՀԿ պատգամավորները, մեկ մարդու նման շարվում են ԱԺ միջանցքում` ողջունելու նրա մուտքը ի փառս Հայոց պառլամենտի:

Թե պարոն Հովհաննեսը իմացել է, որ նիստ լինելու է, դրա համար էլ ասել է` արի Գագո, արի նիստի (տես ինչ ուրախ նիստ ենք անում` տրա-նինա. տրա-նինա):

Իրականում. խնդիրը հետևյալն է. Հովիկ Աբրհամյանը խիստ է ցանկանում, որ Գ. Ծառուկյանը` յուր ԲՀԿ-ով, առաջիկայում կոալիցիայի մաս կազմի: Այդ է լոկ պատճառը, որ հավերժ ամեն  ինչով զբաղված Կոլյայիչը, որ մինչև հիմա ժամանակ չէր գտնում այցելելու իր աշխատանքի հիմնական վայր` պառլամենտ, այսուհետև պերմանենտ գալու ու գնալու է ԱԺ, նստելու  ու նստելու է… ԱԺ դահլիճում, աշխատելու ու աշխատելու է:

Ի դեպ. մեր հստակ տեղեկություններով, խորհրդարանական ընտրություններից դեռ մեկ ամիս չանցած, մի նեղ շրջապատում Գագիկ Կոլյայիչը ի խորոց սրտի բացականչել է` «ա`յ մարդ, ընչի սենց բան արեցի, ընչի չմտա կոալիցիա, կմտնեի, ամեն ինչից կպրծնեի»:

Արդյո՞ք խնամի Հովիկին կհաջողվի այս անգամ այդ գործը գլուխ բերել:

Լավատեղյակները պնդում են` «բայց` խի՞ պտի Սերժ Սարգսյանը համաձայնի դրան. իրենք էն ժամանակ էին պետք, հիմա սուփրի վրա ավելորդ բերանի համար տեղ չկա»:

Վահե Հովսեփյան