Qnet ընկերության  մասին մեր հրապարակումն ավելի հիմնավոր դարձնելու համար դիմել էինք ոստիկանությանը՝ խնդրելով պարզաբանել նրանց գործունեության հետ կապված մանրամասներ: Qnet՝ ցանցային խարդախություն, թե՞ աղանդ | Arm Version

Ի դեպ, հիշեցնենք, որ մի քանի Qnet –ականներ սպառնալիքներ են հնչեցրել մեր հասցեին՝ խոստանալով գալ հաշվեհարդարի:

Սակայն այդպես էլ, ոչ ոք չեկավ, իսկ դրանից հետո տարօրինակ լռություն տիրեց:

Օրերս նրանք, կարծես, կրկին անհանգիստ էին ու կայքին նոր հղումներ են ուղարկել, հիշեցնելով, որ սպասում են ոստիկանության պատասխանի հրապարակմանը:

Տարօրինակ զուգադիպությամբ ոստիկանությունը դրանից  5 օր առաջ էր պատասխանել մեզ. արդյո՞ք կապ կա նրանց ու ոստիկանության միջև, գիտեի՞ն, որ արդեն ստացել ենք պատասխանը, ու անհանգիստ էին, կպարզենք առաջիկայում:

Իսկ մինչ այդ, մեզ հայտնի դարձավ, որ ոստիկանության  6-րդ վարչությունում, որտեղից մենք ակնկալում էինք պատասախան, Qnet-ի հետ կապված ինչ- որ խառն են ու պատասխանը «Հայկական Վարկած»-ը ստացավ 28 օր հետո, արդարացի լինելու համար նշենք, որ հարցումն ուղարկվել է ամանօրյա տոներից առաջ՝ դեկտեմբերի 22-ին:

Այս թեման, իհարկե, դեռ շարունակելի է, սակայն ներկա պահին բավարարվենք՝ հրապարակելով  ՀՀ Ոստիկանության մեզ ուղարկած պաշտոնական պատասխանը:

«Ձեր հարցմանն ի պատասխան հայտնում ենք, որ Չինաստանի Ժողովրդավարական Հանրապետության Հոնկոնգ քաղաքի օֆշորային գոտում գործող ներցանցային մարկետինգով զբաղվող «QNET» (նախկինում «QuestNet» և «GoldQuest») միջազգային կազմակերպության Հայաստանյան ցանցը ստեղծելու կապակցությամբ 2009 թ.-ի դեկտեմբերի 3-ին հարուցվել է քրեական գործ, որի շրջանակներում 2009 թ.-ի դեկտեմբերի 3-ին ձերբակալվել են թվով երկու քաղաքացիներ, իսկ 2009 թ.-ի դեկտեմբերի 5-ին վերջիններիս մեղադրանք էր առաջադրվել ՀՀ քր. օր.-ի 178-րդ հոդվածի 3-րդ մասի 1-ին կետով՝ վստահությունը չարաշահելու եղանակով ուրիշի գույքը առանձնապես խոշոր չափերով հափշտակելու համար:

Մեղադրանքը դատարանում պաշտպանելու համար ապացույցների բավարար չլինելու պատճառով 2011 թ.-ի ապրիլի 1-ի համապատասխան որոշմամբ նշված քրեական գործով վարույթը կարճվել է, իսկ քրեական հետապնդումը՝ դադարեցվել:

Տեղեկացնում ենք նաև, որ 2011 թ. հունիս ամսից Հայաստանի Հանրապետությունում

«QNET» կազմակերպության ներկայացուցիչ է հանդիսանում «Միքս Թրեյդ» ՍՊ ընկերությունը, որի կողմից կատարված խարդախության կամ այլ հանցագործության վերաբերյալ ՀՀ ոստիկանությունում դիմումներ չեն ստացվել և դեպքեր չեն արձանագրվել»:

Հ.Գ. Ի դեպ, հիշեցնենք հարցը. տեղյակ է արդյո՞ք ոստիկանությունը այս կառույցի մասին: Խնդրում ենք պարզաբանել՝ ինչ -որ բան նախձեռնվո՞ւմ է նշված հարցով՝ հաշվի առնելով ստորև բերվող փաստերը.  «Հարևան Թուքիայում 2010թ.-ին գործունեությունը սկսած 150 Qnet- ականներից 80-ը ձերբակալվել են: 2011թ.-ին Թուքիայում Qnet-ի գործունեության հետախուզում է հայտարարվել: Շրի Լանկայում հայտնաբերվել է Qnet-ի կողմից ապօրինի արտահատված 15 մլն ԱՄՆ դոլար և օրենքով սահմանվել է Qnet-ի ցանկացած հայտանաբերված ներկայացուցչի  երեք տարի ազատազրկում: Սիրիայի Էկոնոմիկայի նախարարությունը 2009 թվականին միջոցներ է ձեռնարկել Qnet-ի լուծարմանը հասնելու նպատակով: Նեպալում 2003թ.-ին արգելել են Qnet-ի գործունեությունը և Նեպալի կենտրոնական բանկի արժութային գործարքների ղեկավար Կ. Բ. Մանադխարը հայտարարել է, որ նրանց գործունեությունը «100 %-անոց խարդախություն է»: