«Ժառանգություն» կուսակցության գլխավոր քարտուղար Ստյոպա Սաֆարյանը Ֆեյսբուք-ի իր էջում գրել է.

«Հայաստանի «ընտրողների» թիվը կրկին ավելացել է… 6 ամսվա ընթացքում 25.000-ով: Կամ «ընտրողների» խմբաքանակ են ներկրել, կամ էլ որոշ «պադոշ» ընտրողներ, չնայած անբարենպաստ սոցիալ-տնտեսական պայմաններին, բակտերիայի նման բազմացել են… Դեհ, երկրիս մինուճար ներկրողներն էլ են հայտնի, բակտերիայի նման բազմացողներն էլ…

Ահա թե ինչու Ավանի ընտրությունների ժամանակ Ոստիկանությունը հրաժարվեց ինձ տրամադրել Հանրապետության բոլոր ընտրողների էլեկտրոնային ցուցակը: Ավելացումները պետք է «աչքից ու շառից հեռու», «ինքնաբուխ» ու «բնական» լինեին… Այլապես, հասկանում եք, հնարավոր կլիներ պարզել, թե հիմնական փոփոխությունները երբ են կատարվել’ մայիսի 6-ից մինչեւ հոկտեմբեր-նոյեմբեր ամիսնե՞րը, թե դրանից հետո’ մինչեւ դեկտեմբերի վերջը…

Մեր երկրում ամոթը իսպառ մեռել է: Կապ չունի, որ երկիրը լքածների թիվը այս տարի էլ գերազանցել է երկիր մտածների թվին: Միեւնույնն է, ընտրողների ռեգիստրը տրաքում է: Վստահ եղեք, մեռելոցից հետո ընտրողների թիվը դեռ էլի կաճի: Դիմացեք, ժողովուրդ:

Իսկ Ամենայն հայոց ընտրողիկոս «Տիգրան Մուկուչյան և Co» ՍՊԸ-ն գիտի դրանք ցնդող թանքներով պարտակելու բոլոր 40 ձևերը, որոնցից ոչ մեկ չի տեղավորվում Քրեական օրենսգրքի մեջ..»: