Ամանորի գիշերը միշտ էլ լի է անակնկալներով` ոմանց համար լավ, ոմանց համար վատ. այս տարի այն խաղաղ չի անցել նաև Սևանի «Ախթամար» համալիրում:

Մեր ունեցած տեղեկություններով, այստեղ տեղի ունեցած միջադեպը, որին խառնված են մի շարք բարձրաստիճան անձիք, փորձում են «ջրել»:
Ախթամարում՝ 31- ի գիշերը, տոնական տրամադրությունը վերածվել է մղձավանջի, երբ ներկաներից մեկը, որն, ի դեպ, Ոստիկանության 6-րդ վարչության աշխատակից է, հարբել է ու մոռացել, թե՝ որտեղ է գտնվում:
Ալրաղացի Լյովի օբյեկտում՝ նրա մոր ներկայությամբ, հայհոյանքները «6 –ի» աշխատակցին չի ներվել: Երիտասարդին դուրս են բերել երեկույթից ու դաժան ծեծի ենթարկել, որից հետո վերջինս փորձել է իր մեքենայով հեռանալ դեպքի վայրից, սակայն ծեծի ազդեցությունը, թե մեկ այլ պատճառ, ոստիկանին ստիպել է մոլորվել ձների մեջ. նրան ճանապարհին «գտել են» Սևանի ոստիկանները և տարել բաժանմունք:
Այստեղ 6-ի աշխատակիցը, մեզ հասած տեղեկությամբ, իր բողոքում, ամենայն մանրամասնությամբ, նկարագրել է իր հետ կատարվածը:

Ի դեպ, ծեծված ոստիկանը լուրջ ազգակցական կապեր ունի, ուստի չի վախեցել պատմել կատարվածը, կամ էլ նա գիտակցել է, որ այդքանից հետո դժվար թե մնա իր տեղում և որոշել է գնալ մինչև վերջ, ու, ըստ լուրերի, նրան` դիմումը հետ վերցնել համոզելու փորձերն արդյունք չեն տվել:
Ասում են, շատ վատ դրության մեջ է հայտնվել Աղթամարի սեփականատերը՝ Ալրաղացի Լյովը, որի անունը, նման միջադեպերի առումով, հազիվ էր իջել լուրերի առաջին հորիզոնականից:
Մեր ունեցած տեղեկությամբ, սկզբում ձերբակալվել է Ալրաղացի Լյովի տղաներից միայն մեկ անձ, որը սակայն չի կալանավորվել: Սրանից կարելի է ենթադրել, որ հանցագործությունը, եթե իհարկե գրանցվել է, որակվել է ծեծ և ոչ թե խուլիգանություն` կատարված մի խումբ անձանց կողմից:
Արդյո՞ք միջադեպը հարթելու նախնական պայմանավորվածություն է եղել. կա երկու վարկած. 1-ին՝ Լյովիկի տղաները ոստիկան ծեծելու համար չեն պատժվում, ծեծվածը բողոքը հետ է վերցնում և դրա դիմաց ոստիկանին անհարիր վարքի պատճառով չի ազատվում աշխատանքից, 2-րդ՝ այնուամենայնիվ, ոստիկանն իր պատիվն ավելի բարձր է դասում ու աշխատանքը կորցնելով հանդերձ, գնում մինչև վերջ:

Վաղը «Հայկական Վարկած»-ը կփորձի պաշտոնական պատասխան ստանալ Ոստիկանությունից, թե այս վարկածներից, որն է ավելի ընդունելի եղել, ի սկզբանե, հավանական համարելով առաջինը, որն ավելի մոտ է մեր իրականությանը, ասել է թե՝ վարկած, որն ավելի հայկական է: