Այսօր` հունվարի 4-ին՝ ժամը 18.00-ին, Հայաստանի Կենտրոնական ընտրական հանձնաժողովն ավարտել է նախագահի թեկնածուների առաջադրման փաստաթղթերի ընդունումը:  ԿԸՀ-ի մամուլի կենտրոնից  հայտնել են, որ բոլոր անհրաժեշտ փաստաթղթերը, գրավի վճարման անդորրագրերը, ներկայացրել են յոթ թեկնածուներ: Նրանք են` Հայաստանի գործող նախագահը՝ Հանրապետական կուսակցության առաջնորդ Սերժ Սարգսյանը, «Ժառանգություն» կուսակցության առաջնորդ Րաֆֆի Հովհաննիսյանը,  «Ազատություն» կուսակցության ղեկավար Հրանտ Բագրատյանը, «Ազգային ինքնորոշում» միավորման ղեկավար Պարույր Հայրիկյանը,   Լեռնային Ղարաբաղի նախկին արտգործնախարար Արման Մելիքյանը, «Ռադիո հայ» ՍՊԸ-ի տնօրեն Անդրեաս Ղուկասյանը եւ  անկուսակցական, էպոսագետ Վարդան Սեդրակյանը:

ԿԸՀ  փաստաթղթեր ներկայացրած, սակայն գրավ չվճարած ութ թեկնածուները փաստացի դուրս են մղվում մրցապայքարից:  Նրանք են` անկուսակցական կարատեիստ Տարոն Աբրահամյանը, անկուսակցական  գործազուրկ  Ռոբերտ Ահարոնյանը, Մարդու իրավունքների Եվրադատարանի փաստաբան Ռուբեն Այվազյանը, անկուսակցական  գործազուրկ   Մհեր Հայրապետյանը, «Ազգային համաձայնություն» կուսակցության ղեկավար Արամ Հարությունյանը, Մամուլի ազգային ակումբի տնօրեն Նարինե Մկրտչյանը, անկուսակցական թոշակառու Պավլիկ Սարգսյանը, «Քաշաթաղ» հասարակական կազմակերպության ղեկավար Ռոբերտ Սիմոնյանը:

Ընտրական օրենսգրքը ԿԸՀ-ն գրանցման համար սահմանել է  10 օր: