Շատ ենք սիրում խմել: Խմում ենք հնարավոր ու անհնար բոլոր առիթներով: Հայաստանում էլ մեկ շնչին 16 լիտր օղի է բաժին ընկնում. այս ցուցանիշով էլ աշխարհում գրավում ենք երրորդ հորիզոնականը՝  Ռուսաստանից ու Մոլդովայից հետո:

«Հայաստանը պետք է դառնա գինի արտադրող երկիր, պետք է բարձացվի օղու ակցիզի գինը և իջեցվի գինունը: Եթե Հայաստանը դառնա «գինի խմող» երկիր, բյուջե կմտնի հավելյալ 5 մլրդ դրամ»,-բյուջեի քննարկման ժամանակ ասաց ԱԺ պատգամավոր Հրանտ Բագրատյանը:

Հայաստանի գինեգործների միության նախագահ Ավագ Հարությունյանը ևս համակարծիք է նախկին վարչապետին. «Խաղողի գինիների ակցիզային հարկը ընդհանրապես պետք է հանվեր, կամ գոնե պահպանվեր նախկին դրույքաչափերը: Առաջարկ կար օղու ակցիզային հարկը բարձացնել այն չափով, ինչքանով որ պետությունը կկորցներ գինու մեջ: Մենք «օղի խմող » ազգ ենք, իսկ մեզ մոտ օղին պետք է թանկ լինի գինուց: Մենք չենք ուզում, որ միանգամից բարձրանան օղու գները, բայց գոնե դրան մոտ բան լինի: 40 տոկոս թնդությամբ, 0,5 լիտր օղու  արժեքը 1000 դրամ է: 10 տոկոս  թնդությամբ նույն չափի գինու արժեքը կրկին նույն գինն է: Այսինքն՝ գինին ու օղին նույն գինն են»:

Գինեգործն ասաց, որ  ամբողջ աշխարհում օղու արժեքն ավելի բարձր է լինում, քան՝ գինունը: «Դրա համար առաջիկա 5 տարում  2անգամ պետք է բարձրանա օղու գինը, կամ գոնե 4 անգամ՝ առաջիկա 7 տարում, որպեսզի օղու և գինու անհավասար քաղաքականության մեջ արդար լինի մրցակցությունը: Առաջարկի բուն էությունն այն է, որ պետությունը  գինու ակցիզային հարկը վերացնի ու օղու ակցիզային հարկը ընդամենը տասը դրամով մեծացնի», -կարծում է զրուցակիցս, իսկ բյուջեն վտանգելու պետության մտավախության վերաբերյալ էլ նկատում, որ  այն չի վտանգվում. «Բացը լրացվում  է շահութահարկի,  ավելացված արժեքի հարկի հաշվին»:

Հետաքրքիր է, երկրում տիրում է առանց այն էլ անհուսալի վիճակ, բյուջեն ունի ճեղքվածքներ, իսկ  5 մլրդ դրամը քիչ փող չէ մեզանում առկա վիճակը մի փոքր թեթևացնելու համար: Մտածելու տեղիք է տալիս՝ ինչու՞ մեր կառավարությունը չի գնում այս քայլին: Պրն Հարությունյանը մեկնաբանում է.« Օղի արտադրող կազմակերպություններն ահագին ուժեղ են: Կարծում եմ՝ մեր պետության ուժը հիմա չի պատում»: