Շիրակի մարզպետը՝ Աշոտ Գիզիրյանը, վստահ է, որ ՀՀ 2013 թ-ի նախագահի ընտրությանը Գյումրու քաղաքապետ Սամվել Բալասանյանն աշխատելու է Սերժ Սարգսյանի օգտին: Այս մասին Աշոտ Գիզիրյանն ասել է «Ժամանակ» օրաթերթին տված իր հարցազրույցում: Մարզպետը նախ համոզմունք է հայտնել, որ նախագահական ընտրություններում, եթե անգամ առաջադրվեր ԲՀԿ նախագահ Գագիկ Ծառուկյանը, միևնույնն է, իրենց թեկնածու Սերժ Սարգսյանը Գյումրիում կհաղթեր: Ապա կարծիք է հայտնել, որ նախագահական ընտրություններին ԲՀԿ Գյումրիի կառույցը կցանկանա աշխատել իրենց թեկնածուի համար: «Պաշտոնապես աշխատելու համար չգիտեմ, նայած, թե ինչ ցուցում կունենան, բայց տեղում, կարծում եմ, որ քաղաքապետը կաշխատի ինչպես որ պետք է»,– ասել է Գիզիրյանը:

Galatv.am-ը փորձել է այս հարցազրույցի առնչությամբ ճշտել Գյումրու քաղաքապետ Սամվել Բալասանյանի կարծիքը: Փաստորեն ստացվում է, որ գեներալ մարզպետը Գյումրու քաղաքապետի փոխարեն երաշխավորում է, որ Բալասանյանն աշխատելու է Սերժ Սարգսյանի օգտին: Այդ մասին Սամվել Բալասանյա՞նն է արդյոք Աշոտ Գիզիրյանին ասել, թե՞ Գիզիրյանն ինքն է որոշել, որ Բալասանյանն աշխատելու է ՀՀԿ թեկնածուի օգտին: ԳԱԼԱ-ի այս հարցերին Ս. Բալասանյանի պաշտոնական տեսակետը փոխանցել է նրա մամլո խոսնակ Զոհրապ Եգանյանը: «Ես կարդացել եմ պարոն մարզպետի հարցազրույցը, իմ մոտ տպավորություն է ստեղծվել, որ պարոն մարզպետն արտահայտում է իր կարծիքը, իր անհատական կարծիքը, ինչ մնում է Սամվել Բալասանյանի որոշմանը, ասեմ, որ ժամանակը կգա եւ պարոն Բալասանյանը իր տեսակետը, իր կարծիքը կարտահայտի»,-ասաց Զոհրապ Եգանյանը:

Galatv.am