Հայաստանի դատական համակարգում լուրջ տեղաշարժեր են սպասվում: Panorama.am-ի աղբյուրների հաղորդմամբ շուրջ 6 դատավոր իրենց լիազորությունները դադարեցնելու վերաբերյալ դիմում են գրել: Հայաստանի դատական դեպարտամենտի լրատվական ծառայության ղեկավար Արսեն Բաբայանը Panorama.am-ի թղթակցի հետ զրույցում ոչ հերքեց և ոչ էլ հաստատեց լուրը` ասելով, որ իրեն նման տեղեկություն հայտնի չէ:

Ավելի վաղ Panorama.am-ը տեղեկացրել էր, որ ՀՀ Վճռաբեկ դատարանի նախագահ Արման Մկրտումյանը 20 դատավորների վերաբերյալ համապատասխան հաղորդում է ներկայացրել Հայաստանի Հանրապետության դատարանների նախագահների խորհրդի էթիկայի հանձնաժողովին: Բացի այդ 2 դատավորի վերաբերյալ հաղորդում է ներկայացրել Արդարադատության խորհրդի կարգապահական հանձնաժողովին` դատավորների նկատմամբ կարգապահական վարույթ հարուցելու հարցն օրենքով սահմանված կարգով քննարկելու համար, որի քննության արդյունքներով երկու դատավորի նկատմամբ հարուցվել են կարգապահական վարույթներ:

«Արդարադատության խորհրդի վարույթներ գաղտնի են և դրանց վերաբերյալ ոչինչ չի կարելի հրապարակել, մինչև չավարտվի վարույթը և չլինի ուժի մեջ մտած որոշում», Panorama.am-ի թղթակցի հետ զրույցում ասաց Արսեն Բաբայանը:

Panorama.am

Հ.Գ. Ինչ խոսք, դատավորները, որոնց անունները շուտով կորոշակիացվի, դիմում են գրել ոչ սեփական ցանկությամբ: Հավաստի վարկած է, որ վերընշված վեց դատավորներին ստիպել են այդ անել,  քանի որ այդ դեպքում նրանք թոշակ կստանան, իսկ պաշտոնից ազատվելիս՝ կզրկվեն թոշակից: