Օրերս ՀՀ ֆինանսների նախարարության ֆինանսական վերահսկողական տեսչության պետ Սոնա Ղարիբյանն,  ամփոփելով տեսչության կատարած բացահայտումները, նշել էր, որ Սյունիքի մարզի Տեղ գյուղի դպրոցում տեղի է ունեցել փլուզում: «Պետք է կատարվեր ամրացման աշխատանքներ, հետո նոր միայն հիմնանորոգման աշխատանքներ»,- ասել էր նա. իսկ իրականում 60 տարվա դպրոցի շենքում կատարվել է նախ կոսմետիկ աշխատանքներ, որից հետո դպրոցը փլվել էր…

«Այս երևույթը քաղաքաշինության ոլորտում համատարած բնույթ է կրում, չկա ընտրված որևէ օբյեկտ, որտեղ խախտումներ չլինեին»,- հայտարարել է  Սոնա Ղարիբյանը, նշելով, որ ամեն դեպքում պատասխանատվությունը կրում են կապալառու շինարարական ընկերությունները: «Նրանք պարտավորվում են ամբողջությամբ վերականգնել փոշիացված միջոցները», -ընդծգել է նա:

Արդյո՞ք այս ամենն, ի սկզբանե, աշխատանքների ոչ ճիշտ կազմակերպման հետևանք չէ, որի արդյունքում մի շարք գերատեսչություններ շահում են հսկայական գումարներ:

Ինչո՞ւ նախապես չի հստակեցվում, թե ում է վստահվում նման կարևոր աշխատանքների կատարումը և ինչո՞ւ ընթացքում ստուգումներ չեն իրականացվում՝ կանխելու հնարավոր ռիսկերը:

Ղարիբյանը՝ որպես հարցի մասնակի հասցատեր, մեղադրում  է քաղաքաշինության նախարարությանը. այնտեղ են մրցույթներ հայտարարում, այնտեղ էլ զբաղվում ծրագրերի իրականացմամբ։
Ըստ Ղարիբյանի արձանագրված խախտումների արդյունքում սահմանվել են առավել քան 23 մլն դրամի տույժեր:

Բացի նշված խախտումներից,  արձանագրվել են կառավարության որոշումներով սահմանված չափանիշների խախտումներ. որոշ տեղերում աշխատանքները սկսվել են առանց շենքերի սեյսմիկ վիճակը ստուգելու. փոփոխությունները կատարվել են կամայականորեն:

Այս ամենն, իհարկե, շատ տպավորիչ է, սակայն Սոնա Ղարիբյանը չէր նշել, թե կոնկրետ ո՞ր ընկերությունն էր զբաղվում փլված դպրոցի շինաշխատանքներով: «Հայկական Վարկած»-ի հետաքննությունն, այս առումով, մի շարք հետաքրքիր փաստեր բացահայտեց.

«Հայկական Վարկած»-ը նախ  զրուցեց Ֆինանսների նախարարության աշխատակից Կարապետ  Շաքարյանի հետ:

«Տեղ գյուղի դպրոցի աշխատանքները սկսվել են 2009-ի սեպտեմբերից, հետո փլուզվելուց հետո,  2011թ-ի սեպտեմբերից կապալառուն կառուցում է նոր շենք», — տեղեկացրեց նա:

Նշենք, որ դպրոցը փլուզվել էր 2011թ.-ի հունիսի 9-ին. դեպքի վայր մեկնած հատուկ փրկարարկան ջոկատի օպերատիվ խումբը պարզել էր, որ  փլուզվել է գյուղի թիվ 1 միջնակարգ դպրոցի երկհարկանի կենտրոնական մասնաշենքը, որի նկուղային հարկում մայիս ամսից կատարվում էին շինարարական աշխատանքներ:
«Դպրոցի շենքը վթարային է եղել, շենքի ամրացման աշխատանքներով զբաղվել է «Առվա Երկիր» ընկերությունը: Բայց չեմ հասկանում՝ ինչի՞ եք ուզում իմանալ»,-հետաքրքված էր ֆիննախի աշխատակիցը:

Հարցին, թե ո՞վ է պատվիրել, և ինչպե՞ս է եղել, որ վթարային շենքի համար կոսմետիկ վերանորոգման պատվեր է իջեցվել, արդյո՞ք Կառավարությունը տեղյակ է եղել, Շաքարյանը խուսափեց պատասխանել, արագ հակադարձելով . «Ես ինչ իմանամ, պետք է թղթերը նայեմ, ասեմ, ես Կառավարության անուն եմ տվել, կարո՞ղ է հոդված եք գրում»:

Զրուցեցինք  նաև «Առվա Երկիր» ընկերության տնօրեն Կարեն Մակարյանի հետ: Ի տարբերություն Կարապետ Շաքարյանի, նա հստակ նշեց, որ պատվիրատուն եղել է Կառավարությունը:

Տնօրենի պարզաբանմամբ,  իրականում իրենք Կառավարության կողմից հիմնանորոգման աշխատանքներ սկսելու պատվեր չեն ստացել, միայն պատուհաններն ու դռները փոխելու պատվեր է եղել ու փոխել են, այսինքն՝ զբաղվել են կոսմետիկ վերանորոգման աշխատանքներով.

«Երբ շենքը փլուզվեց, դե 60 տարվա շենք էր, նոր Կառավարությունը  գումար տրամադրեց և նոր, ավելի լավ պայմաններով  2011թ-ին սկսվեց դպրոցի շինարարությունը: Առաջվա տեղից մի փոքր այն կողմ է կառուցվում ու Երևանի դպրոցներից  շատ ավելի լավն է. մենակ այդ դպրոցը չէ, Ղափանում էլ կար այդպիսի դպրոց»,-մանրամասնեց ընկերության տնօրենը:

Հարցին, թե ձեր ընկերությունը զբաղվե՞լ  է ամրացման աշխատանքներով, Կարեն Մակարյանն ասաց. «Ընդամենը տանիքի ամրացում է եղել. պատվիրատուն  Քաղշին նախարարությունն է եղել, դուք նրանցից ճշտեք»:

Շատ հետաքրքիր է ստացվում. Կառավարությունը իջեցնում է կոսմետիկ վերանորոգման պատվեր, 60 տարվա շենքը նախ կոսմետիկ են վերանորոգում՝ դուռ- պատուհան փոխում, հետո քաղաքաշինության նախարարությունը պատվիրում է տանիքն ամրացնել, հետո դպրոցը փլուզվում է, հետո նորն են կառուցում: Ֆինանսների նախարարությունն էլ արձանագրում է այս ամենը՝ որպես բացահայտված չարաշահում:

Իրականում ի՞նչ է փոխվում. մեր պետական կառույցներն իրարից անտեղյա՞կ են աշխատում, թե սա էլ փող լվանալու այն հերթական դեպքերից մեկն է, որին ականատես ենք լինում ամեն քայլափոխի:

Աննա Սարգսյան