Այսօր՝ Ֆրանսիայի խորհրդարանի պատգամավոր, «Հանուն ժողովրդական շարժման միության» անդամ Վալերի Բուայեն 3 տեքստ է ներկայացրել Ազգային ժողով, որոնք ուղղված են 2001թ–ին ընդունված օրենքը (որով Ֆրանսիան պաշտոնապես ճանաչում է 1915թ. Հայոց ցեղասպանությունը), պաշտպանության տակ առնելուն։

2012թ. դեկտեմբերի 13-ին պատգամավորը  հաղորդագրություն է տարածել, որը հրապարակվել է «Nouvelles d’Arménie» ամսագրի կայքում.

Հայտարարության մեջ ասվում է.

«Օրենքով ճանաչված ցեղասպանությունների հերքումը քրեականացնող օրինագծի ընդունումից և Սահմանադրական խորհրդի գրաքննությունից հետո ես չհրաժարվեցի պայքարից:

Այդ իսկ պատճառով Ազգային ժողով եմ ներկայացրել երեք տեքստ՝ 2001թ. Ֆրանսիայի կողմից 1915թ. Հայոց ցեղասպանության պաշտոնական ճանաչման մասին օրենքը պաշտպանելու նպատակով: Դրանք են.

1.2011թ. հոկտեմբերի 18-ին ներկայացված օրինագիծն իր նախնական տեսքով, որը 45 հազար եվրոյի տուգանք և 1 տարվա ազատազրկում, կամ այդ երկու պատիժներից մեկն է նախատեսում բոլոր նրանց համար, ովքեր հրապարակավ կխրախուսեն, կվիճարկեն կամ կփորձեն արդարացնել ցեղասպանությունները, մարդկության դեմ հանցագործությունները և ռազմական հանցագործությունները:

2. Օրենքով ճանաչված ցեղասպանությունների հերքումը քրեականացնող օրինագիծն այն տեսքով, որով 2012թ. հունվարի 23-ին ընդունվել էր եւ 2012-ի փետրվարի 28-ին ենթարկվել Սահմանադրական խորհրդի գրաքննությանը:

3. Մարսելի փաստաբանների կոլեգիայի անդամ պարոն Ֆիլիպ Գրիգորյանի օգնությամբ, Սահմանադրական խորհրդի վերոհիշյալ որոշման վրա լույս սփռելու նպատակով, Սահմանադրական խորհրդի հրապարակային դիրքորոշման պատճառները հետաքննող ժամանակավոր հանձնաժողով ստեղծելու բանաձեւ եմ ներկայացրել:

Այդ բոլոր երեք տեքստերն, իմ կարծիքով, այդ գործի հաջող ելքի հույս են տալիս, որի նպատակը, ես ուզում եմ մեկ անգամ ևս հիշեցնել, պետք է արձագանք գտնի յուրաքանչյուր ֆրանսիացու սրտում` որպես  մարդու իրավունքների պաշտպանության կոչ: Այդ պատճառով էլ ես հանդիսավոր խնդրում եմ Ազգային ժողովի նախագահ Կլոդ Բարտոլոնին՝ կարճ ժամկետում Ազգային ժողովի օրակարգում ընդգրկել այդ երեք տեքստերը, որոնք ցանկացած տեսակի քաղաքական տարաձայնությունների, կուսակցական պատկանելության և մեծամասնության կամ ընդդիմության  ցանկացած դիրքորոշման սահմաններից դուրս են: 2001թ. օրինագիծը շրջադարձային էր Մարդու իրավունքների ճանապարհին։ Այս օրինագծերն ուղղված են համաձայնեցնել քրեական օրենքներն ու 2001թ. օրենքի պաշտպանությունը Ֆրանսիան չպետք է կանգ առնի կես ճանապարհին»: