«Սևան» Ազգային Պարկի հետ կապված թնջուկը, ճիշտ է, դուրս է մղվել հանրության ուշադրությունից, սակայն այնտեղ շարունակվում են մի շարք  կարևոր գործընթացներ: Հիշեցնենք, որ փոխտնօրենի պաշտոնում կալանավորվել է ազգային պարկի երկարամյա տնօրեն Գ. Մարտիրոսյանը, ՀՀ կառավարությանն առընթեր ԱԳԿ ՊԿ-ի Դիլիջանի սպասարկման գրասենյակի ղեկավար Է. Առաքելյանը, Կադաստրի պետական կոմիտեի Ճամբարակի ստորաբաժանման նախկին ղեկավար Ժիրայր Ստեփանյանը:

Ներկայումս դատախազությունը լրջորեն զբաղվում է ՊՈԱԿ-ի հարցերով:

Այս և Սևան ԱՊ-ի հետ կապված մի շարք հարցերի շուրջ պարզաբանումներ «Հայկական Վարկածը» խնդրել էր Տարածքային կառավարման նախարար Արմեն Գևորգյանից, որը նաև Սևանի հարցերով հիմնախնդիրների համակարգողն է:

Պատասխանը ստացվեց բնապահպանության նախարարության աշխատակազմից՝ Է. Փիրումյանի ստորագրությամբ. այն ներկայացնում ենք ստորև.

-Պայմանագրերի վերակնքումը կասեցվել է, շարունակվելո՞ւ է, թե ոչ, եթե ոչ, ապա ինչո՞ւ.

-«Սևան» Ազգային պարկի տարածքի հողամասերի վարձակալության մասին կնքված պայմանագրերի փաստաթղթերը ՀՀ օրենսդրության պահանջներին համապատասխանեցնելուց հետո, այդ պայմանագրերի վերակնքումը կշարունակվի:

— 300 -400 պայմանագրեր, մեր ունեցած տեղեկություններով, չունեն նոտարական գրանցում. այն պայմանագրերը, որոնք չունեն պետական գրանցում, ունենալո՞ւ են և ինչ կերպ, ինչպե՞ս եք տեսնում այս հարցի կարգավորումը:

— Ներկայումս նոտարական գրանցում չունեցող շուրջ 200 պայմանագիր ուսումնասիրվում է, դրանք ՀՀ կառավարության 2008 թվականի դեկտեմբերի 18-ի  N 1563-Ն որոշմամաբ սահմանված պահանջներին համապատասխանելու դեպքում, սահմանված կարգով  ընթացք կստանան:

— Կա՞ն ափամերձ  տարածքներ, որոնք կադաստրի գրանցում չունեն, սակայն ունեն պայմանագիր, դա, բնական է, վարձակալի մեղքով չէ, սակայն տույժեր ու տուգանքներ է գանձվում: Արդյո՞ք միտումնավոր չէ վարձակալության փաստաթղթերն ամբողջովին չկանոնակարգվելը , որպեսզի մարդկանցից հավելյալ գումարներ կորզվեն:

— Հողամասերի վարձակալության մասին կնքված պայմանագրեր ունեցող, սակայն կադաստրի պետական գրանցում չունեցող իրավաբանական և ֆիզիկական անձանցից տուգանքներ չեն գանձվում, դրանցից օրենքով սահմանված կարգով գանձվում է միայն հողօգտագործման վճար:

— Բնապահպանության նախարար Ա. Հարությունյանը տեղեկություններ է ներկայացրել «Սևան ազգային պարկ» ՊՈԱԿ-ի տարածքում անտառհատումների վերաբերյալ: Նշվել է, որ ՊՈԱԿ-ի «Սևան» մասնաճյուղում խնդիրներ են բացահայտվել, որոնց հետ կապված նյութերը կներկայացվեն իրավապահ մարմիններին: Մեր ունեցած տեղեկություններով, Նորադուսի և Մարտունու տարածքում անխնա կտրվում են ծառերը և վաճառվում: Խնդրում ենք մանրամասներ:

— Սևան» ազգային պարկ» ՊՈԱԿ-ի «Սևան» մասնաճյուղում հայտնաբերված ապօրինի անտառահատումների վերաբերյալ արձանագրված նյութերն ուղարկվել են իրավապահ մարմիններին, իսկ « Նորատուս» և «Մարտունի» մասնաճյուղերի վերաբերյալ նշված տեղեկությունները չեն համապատասխանում իրականությանը: Վերոնշյալ մասնաճյուղերի ջրածածկ  տարածքներում կատարվում են անտառամաքրման աշխատանքներ:

—2009-ից Սևանի հիմնահարցերի հանձնաժողովի ստեղծման օրից  պայմանագրերը չեն վերակնքվում և 3 տարին լրացած պայմանագիր ունեցող վարձակալները չեն կարողանում կողմնորոշվել կատարե՞ն ներդրումներ: Ի՞նչ է նախատեսվում:

— Երեք տարի ժամկետով պայմանագրեր հիմնականում կնքվել են լճի մինչև 1905.0 մետր բացարձակ նիշից ցածր գտնվող տարածքների համար, որտեղ,համաձայն ՀՀ կառավարության 2008 թվականի դեմտեմբերի 18-ի N 1563-Ն որոշմամբ սահմանված կարգի, արգելվում է (որոշ բացառություններով) կատարել կապիտալ շինարարություն:

— Մեր ունեցած տեղեկություններով, հանրային լողափերի անվան տակ, լուծվում են անցանկալի անձանց պատժելու, նրանցից լողափերը  հետ վերցնելու հարցեր: Ի՞նչ սկզբունքով են ընտրվում հանրային լողափ դարձվող տարածքները:

— Հանրային լողափերի տարածքներն ընտրվում են օրենսդրության պահանջներին համապատասխան: Բացի այդ, հաշվի են առնվում նաև հանրության  համար այդ տարածքների հասանելիությունը:

Նշենք, որ որոշ հարցերի պատասխաններ իրենց հետ լրացուցիչ հարցեր բերեցին, որոնց կփորձենք անդրադառանալ մեր հաջորդ հրապարակման մեջ: