Փ. Թերլեմեզյանի անվան պետական քոլեջի ուսանողադասախոսական կազմը բաց նամակ է ուղղել ՀՀ Կրթության և Գիտության նախարար Ա. Աշոտյանին

«Հարգելի պարոն Աշոտյան,
Փ. Թերլեմեզյանի անվան պետական քոլեջի ապագան փրկված տեսնելու ցանկությամբ և այդ հարցում Ձեր աջակցությունն ստանալու ակնկալիքով Ձեզ են դիմում քոլեջի ուսանողները, դասախոսական կազմն ու քոլեջի ճակատագրով անհանգստացած արվեստագետներ և արվեստասերներ:

Ուզում ենք Ձեզ մեծ ցավով տեղեկացնել, որ հեղինակավոր կրթօջախի տնօրենի պաշտոնը սկսել է ժառանգաբար փոխանցվել, և այս անգամ արվեստագետների նոր սերնդի «ապագան կերտելու» հերթը հասել է կիբեռնետիկ ժառանգորդի:

Երկար տարիներ քոլեջը տնօրինում էր լուսահոգի Սամվել Պետրոսյանը, ում հեռացրեցին պաշտոնից՝ նրա փոխարեն իր քրոջ՝ Ալվարդ Պետրոսյանի որդուն՝ Նարեկ Առուշանյանին նշանակելու համար: Այդ դեպքն աղմուկ բարձրացրեց, և Պետրոսյանների ընտանեկան ինտրիգն ակնհայտորեն ստվեր նետեց քոլեջի հեղինակության վրա: Հերթական հարվածը 91-ամյա կրթօջախին հասցվեց ընդամենը վերջերս, երբ կյանքից անժամանակ հեռացած Նարեկ Առուշանյանի փոխարեն տնօրենի ժամանակավոր պաշտոնակատար նշանակվեց նրա այրին՝ արվեստի հետ ոչ մի կապ և անգամ պահանջվող մանկավարժական կրթություն չունեցող, մասնագիտությամբ կիբեռնետիկ Աննա Մնացականյանը, ով պլանավորում է զբաղեցնել այդ պաշտոնը: Ստեղծված դրությունն արդարացի բողոքի ալիք է բարձրացրել կրթօջախի ուսանողության շարքերում, դասախոսկան կազմում, ինչպես նաեւ արվեստագետների ու արվեստասերների լայն շրջանակում:

Քանի որ սույն թվականի դեկտեմբերի 14-ին կայանալու է քոլեջի տնօրենի մրցույթը, խնդրում ենք Ձեր անմիջական հսկողության տակ վերցնել հարցը, որպեսզի ոչ լեգիտիմ թեկնածու, այդ պաշտոնի համար չկարողանա մասնակցել մրցույթին, եւ այն անցկացվի արդար ու թափանցիկ:

Մշակութային ոչ հեշտ ժամանակներ ապրող մեր երկրում մեծ առաքելություն է վերապահված արվեստի կրթօջախներին, որոնց ղեկավարումը չի կարող հայտնվել պատահական մարդկանց ձեռքում:
Վստահ ենք, որ մենք կիսում ենք ՀՀ Կրթության և Գիտության նախարարի համոզմունքները»:

Հ.Գ. նամակի տպագիր տարբերակն ուղարկվել է ՀՀ ԿԳ նախարարություն դրան կից ավելի քան 850 ստորագրություններով: