Մենք խնդիրներ չունենք Ռուսաստանի հետ. եթե առաջանում են հարցեր, դրանք լուծվում են նաև աշխատանքային կարգով. Интерфакс գործակալությանը տված հարցազրույցում հայտարարել է Հայաստանի հանրապետության վարչապետ Տիգրան Սարգսյանը:

«Իսկ պարտքերի հարցով մենք բացարձակապես ոչ մի խնդիր չունենք: Հայաստանի արտաքին պարտքի մակարդակը համարվում է միջինից ցածր, և մենք լիովին կատարում ենք բոլոր պարտավորություններն արտաքին պարտքի սպասարկման հարցում»,նշել է Տ. Սարգսյանը:
Ըստ նրա, հիմնական խնդիրն այն է, որ ստեղծվել է համագործակցության մի հարթակ, որը թույլ կտա բացեիբաց քննարկել ռուս գործընկերների հետ բոլոր հարցերը և ձևավորել միասնական գաղափարական հարթակ համատեղ ապագայի համար:

«Ռազմավարական գործընկերական հարաբերությունները ենթադրում են, որ նման համագործակցության հիմքում ոչ թե շահի հասկացությունն է, այլ՝ ընդհանուր արժեքների, այսինքն՝ համատեղ ապագայի և համատեղ անցյալի մեր ընդհանուր տեսլականը: Եթե կառուցենք ռազմավարական գործընկերությունը միայն շահի հիման վրա, դրանք հազիվ թե կարելի է անվանել ռազմավարական: Ակնհայտ է, որ Հայաստանի և Ռուսաստանի միջև հարաբերությունները չեն կառուցվում միայն շահի հիման վրա»,-ասել է ՀՀ վարչապետը:

Նրա խոսքով, աշխարհում այժմ շատ բուռն գործընթացներ են ընթանում: «Աշխարհը շատ արագ փոխվում է, աճում է երկրների փոխադարձ կախվածությունը: Մարդկության առջև կանգնած են նոր մարտահրավերներ և նոր ռիսկեր: Սա նշանակում է, որ մենք միասին պետք է գտնենք մեր միասնական ապագայի կառուցման ուղիները՝ հաշվի առնելով նոր մարտահրավերներն ու նոր իրողությունները: Սա նշանակում է, որ ներկայումս մենք չունենք միանշանակ պատասխաններ, մեր գործընկերները Ռուսաստանում՝ ևս»,-ասել է Տիգրան Սարգսյանը:

Վարչապետի տեղեկացմամբ, նոր ատոմային էլեկտրակայանի կառուցման ֆինանսավորման 50 տոկոսը կիրականացնի Ռուսաստանը, իսկ 50 տոկոսը՝ հայկական կողմը՝ ըստ ռուսական կողմի հետ պայմանավորվածության։

Ծրագրի համաձան՝ ԱԷԿ-ի շինարարությունը պետք է սկսվեր 2014թ.-ին, սակայն, ըստ Տիգրան Սարգսյանի, Ճապոնիայում տեղի ունեցած դեպքերը (2011թ.-ին «Ֆուկուսիմա» ԱԷԿ-ում) լրացուցիչ շատ ժամանակ խլեցին։