«Սիրիայում տեղի ունեցող պատերազմական գործընթացը ոչ թե սիրիական իշխանության և ընդդիմության ընդհարումներ են, այլ պատերազմ, որի մեջ ներքաշվել են այնպիսի աշխարհաքաղաքական խոշոր դերակատարներ, ինչպիսիք են, ընդդիմության ասվածի կողմից՝ ԱՄՆ-ն, Եվրոպան և առաջին հերթին Թուրքիան, իսկ իշխանությանն աջակցում են Ռուսաստանը, Չինաստանը և Իրանը», -այսօր ասել է  «Նորավանք» հիմնադրամի տնօրեն Գագիկ Հարությունյանը, նշելով, որ Սիրիայում իրադրությունը բավական պայթյունավտանգ է, իսկ լավատեսությունը, ցավոք` քիչ:

Արևմուտքը փորձ է անում Մերձավոր Արևելքում բարձրացնել Թուրքիայի դերակատարությունը և Իրանին թողնել երկրորդ պլանում: Սցենարները երկու ուղղությամբ են. «Այստեղ կարևոր է Թուրքիայի խնդիրը և, փաստ է, որ Թուրքիան դե ֆակտո արդեն պատերազմ է հայտարարել Սիրիային»,- նշել է նա:

Ըստ Հարությունյանի՝ սցենարներից մեկը սա է. Արևմուտքին կհաջողվի տապալել Սիրիայի վարչակազմը և տեղակայել հակաիրանական ռեժիմ, ինչպես դա տեղի ունեցավ Իրաքում, Լիբիայում: «Սրանով նրանք կփորձեն խախտել ուժային բալանսը, մասնավորպես՝ Թուրքիայի և Իրանի հարցում շեշտը դնելով Թուրքիայի կարևորությանը»,- ասել է նա։

Իսկ երկրորդի դեպքում՝ կողմերը լեզու կգտնեն ու հաշտության կգնան:

Սցենարի վատ տարբերակի դեպքում մեծ վտանգ կլինի ողջ տարածաշրջանի համար, և, շատ հնարավոր է, որ հօգուտ Թուրքիայի լուծման դեպքում, սրվեն նաև հայ-ադրբեջանական հարաբերությունները:

Միացյալ Նահանգներում նախագահական ընտրությունների արդյունքները կարևոր դեր կունենան այս սցենարների զարգացման համար: «Եթե Օբաման հաղթի, գուցե, այս գործընթացը շարունակվի, իսկ եթե հանրապետականները՝ գուցե  նվազի»,-նկատել է հիմնադրամի նախագահը: