Հայկական արմատներով ֆրանսիացի երաժիշտ, կոմպոզիտոր, գործիքավորող, դաշնակահար Միշել Լեգրանը Հայաստնում է: Երաժշտի 80-ամյակի առիթով վաղը Հայաստանի պետական ֆիլհարմոնիկ նվագախումբը Լոնդոնի City Lights Entertainment-ի հետ համատեղ  Արամ Խաչատրյան համերգասրահում հանդես է գալու համերգային ծրագրով, որին մասնակցելու է հենց աշխարհահռչակ մաեստրոն:

Միշել Լեգրանը, հայ լրագրողների հետ հանդիպման ժամանակ, անդրադարձել է իր ստեղծագործական անցյալին ու ապագային:Նա նշել է, որ 250 ֆիլմի երաժշտություն է գրել, 800 երգի հեղինակ է, 100 ձայնասկավառակ է թողարկել:

< Չեմ կարծում, որ որևէ մի ստեղծագործություն մյուսից կարևոր է: Որևէ բանի համար չեմ ցավում, չեմ ափսոսում: Հպարտ եմ այն ամենով, ինչ արել եմ: Հաջորդ տարի նախատեսում եմ գրել երաժշտություն նոր ֆիլմի համար, որը նկարահանելու եմ անձամբ: Երաժշտական ֆիլմ կլինի: Մեծ բալետ եմ գրում: Իմ առաջին բալետն է: Ամերիկյան մի ֆիլմի համար երաժշտություն եմ գրում, շուտով կավարտեմ: Գրել եմ կոնցերտ տավիղի և նվագախմբի համար` իմ տիկնոջ համար (տավիղահար Քեթրին Միշել), թավջութակի և նվագախմբի համար պետք է կոնցերտ գրեմ: Մեծ նախագծեր ունեմ, դա ինձ ուրախացնում է>, -ասել է նա:

Արվեստագետը անկեղծացել է,  որ Հայաստանը միշտ իր սրտում է, և որ ինքը դիտել է Եղեռնի մասին գրեթե բոլոր վավերագրական ֆիլմերը: Նրա խոսքով, ցանկություն  ունի երաժշտություն գրել հայկական ֆիլմի համար, սակայն համապատասխան առաջարկ չի եղել: Լեգրանը նկատել է, որ Հայաստան չէր գա, եթե ֆիլհարմոնիկ նվագախումբը լավ կոլեկտիվ չլիներ:

Նշենք, որ Միշել Լեգրանը ծնվել է 1932 թվականի փետրվարի 24-ին, Ֆրանսիայում: Միշել Լեգրանը ավելի շատ հայտնի է ֆիլմերի (շուրջ 200) համար գրված իր երաժշտությամբ: Նրան մեծ հռչակ բերեց «Շերբուրգյան անձրևանոցներ» ֆիլմը: Նա բազմաթիվ հեռուստատեսային հաղորդումների, երաժշտական սցենարների հեղինակ է: Միշել Լեգրանը ավելի քան 100 ձայնասկավառակ է թողարկել: Նա 3 անգամ արժանացել է «Օսկար»-ի, 5 անգամ «Գրեմի» և «Էմմի», 12 անգամ «Ոսկե գլոբուս» մրցանակների: 2003թ.-ին ստացել է «Պատվո լեգեոն» շքանշանը: 22 տարեկանում նա թողարկում է իր առաջին ձայնասկավառակը, որը դառնում է երբևիցե ամենաշատ վաճառված ձայնասկավառակներից մեկը: