Այսօր  լրագրողների հետ հանդիպման ժամանակ Ռուսաստանի հայերի միության նախագահ Արա Աբրահամյանը խոսեց Համաշախարհային հայկական կոնգրեսի համագումարից, նկատելով.«Հոկտեմբերի 15-ին Գիտությունների ազգային ակադեմիայում նոր կոնգրես է տեղի ունենալու, կլինի նաև հաշվետվություն, որի գնահատականը  դուք պետք է տաք: Ամենակարևոր գործերից մեկը, որ մենք արել ենք, դա այն է, որ մենք բացեցինք ինստիտուտ միջազգային իրավունքների, որը կարողացավ 2 կարևոր գործ անել. դա ցեղասպանության վերաբերյալ 3 հատոր գիրքն է, որը համարում եմ ամենահաջողված աշխատանքներից մեկը, և մյուսը Ղարաբաղի վերաբերյալ 2000 էջանոց գիրքը:

Երբ մենք 2000 թվականին բացեցինք Ռուսաստանի հայերի միությունը, կարողացանք կարճ ժամանակում համախմբել Ռուսաստանի հայերին, հետո մեզ մոտ միտք հղացավ, թե ինչու չհամախմբել ամբողջ հայերին: Բոլորը ցանկություն հայտնեցին, որ այդպիսի կառույց մեզ պետք է, և ոչ մի կազմակերպություն այդ գաղափարին դեմ չարտահայտվեց»:

Չնայած այս ամենին, ըստ Աբրահամյանի բազմաթիվ բացթողումներ կան.« Ես այնքան էլ գոհ չեմ, բազմաթիվ բացթողումներ դեռ  կան, կա դրական առողջ քննադատություն: Ես ամեն ինչ քննարկում եմ նախագահի հետ, նույնիսկ  նախագահն ասում է, որ դժգոհ եմ  ամեն ինչից: Մենք շատ ակտիվ աշխատում ենք Հայաստանի կառավարության հետ, հատկապես, երբ բացվեց Սփյուռքի նախարարությունը: Այդ ամեն ինչը շատ կարևոր է, բայց մեր խնդիրներից մեկը Հայաստանի տնտեսական աճին աջակցելն է: Ես գործարար եմ և միշտ փորձել եմ իմ օրինակով օրինակ ծառայել և ներդրումներ անել Հայաստանում»:

Անդրադառնալով Հայաստանի ներքաղաքական խնդիրներին,Արա Աբրահամյանը  նշեց, որ Վարդան Օսկանյանի հետ կատարվածն պատիվ չի բերում ոչ մեկիս, մենք պետք է համբերություն ունենանք, սպասենք տեսնենք ինչ ավարտ է ունենալու:

«Այսօր Հայաստանը լավ հարաբերությունների մեջ է Իրանի հետ, Աստված չանի այնտեղ պատերազմ լինի:
Թուրքիան չի կորցնում առիթը, որ մեզ արժեքազրկի, Ադրբեջանը սպառնում է պատերազմով, վտանգ կա: Վրաստանում իշխանափոխություն է լինելու»:

Անդրադառնալով  մի քանի օր առաջ  Հայաստանում Ռուսասատանի դեսպանի  հայտարարությանը,  Աբրահամյանը նկատեց, որ դրա մեջ ճշմարտություն կա, եթե Հայատանի շահը թույլ է տալիս լավ հարաբերությւոն ունենալ, պետք է ունենանք՝ շահից ելնելով:

Մենք բոլորս պետք է համագործակցենք, մենք պետք է աշխատատեղեր ստեղծենք, որպեսզի  հայաթափ չլինի  Հայաստանն ու Ղարաբաղը»: