«Հայ-թուրքական արձանագրությունները նույն վիճակում են, ինչ-որ էին 3 տարի առաջ, երբ ստորագրվեցին,  և այն մեկնաբանությունները, թե արձանագրությունները մահացել են, այնքան էլ իրականությանը չեն համապատասխանում, որովհետև իրավականորեն այդ արձանագրությունները կան, նախևառաջ այդ արձանագրությունները իրավական փաստաթղթեր են»,- այս մասին այսօր մամուլի ասուլիսի ժամանակ հայտարարեց  ՀՅԴ Հայ դատի և քաղաքական հարցերի գրասենյակի պատասխանատու Կիրո Մանոյանը: Այն, որ  ինչ-որ աշխատանքներ են տարվում ըստ Մանոյանի ճիշտ չէ.«Կա անշուշտ թուրքական կողմի մեկնաբանությունները, որ այդ արձանագրությունները կենդանի են, մահացած չեն և այդ ուղղությամբ ինչ-որ աշխատանքներ են տարվում. դա կիսով չափ է իրականությանը համապատասխանում, այսինքն, որ այդ արձանագրությունները կենդանի են, բայց  նման աշխատանքներ չկան»:

Ըստ Մանոյանի, այդ արձանագրություններն ավելի շատ վնաս են տալիս Հայաստանին, փոխարենը օգուտ են տալիս Թուրքիային: Բանախոսի կարծիքով, 3 տարին բավարար ժամանակ է, որպեսզի արձանագրությունները դադարեն գոյություն ունենալ:  Հայաստանը պետք է հետ վերցնի իր ստորագրությունները: «Թուրքիան ստորագրված արձանագրություններով, վավերացման դեպքում, ստանում է իր ստանալիքի մեծ մասը, փոխարենը տալով ոչինչ: Ըստ արձանագրությունների, ինքը պետք նվազագույնը  տար դիվանագիտական հարաբերությունների հաստատում Հայաստանի հետ և Հայաստանի շրջափակման վերացում. երկուսն էլ չի կատարել»-ասաց նա:

Կիրո Մանոյանը նշեց, որ Թուրքիան այդ արձանագրություններն օգտագործում է որպես լծակ իր երկարամյա  քաղաքական նպատակը հետապնդելու, այսինքն` Արցախի հարցով ինչ-որ դերակատարություն ստանձնելու նպատակով: «Հատկանշական է, որ մի քանի օր առաջ դարձյալ Թուրքիան ինքն իրեն իրավասություն տվեց ասելու բաներ, որոնք իրեն չեն վերաբերում. խոսքը գնում է Ստեփանակերտի օդանավակայանի մասին, որտեղ ինքը ինչ-որ գնահատականներ կատարեց` իրականության մեջ հակասելով ԵԱՀԿ Մինսկի խմբի համանախագահների այս տարվա հուլիսի 13-ի հայտարարությանը, որտեղ հստակ ասվում է, որ համանախագահները խոսել են կողմերի հետ, որ կողմերը հանձն են առել քաղաքացիական թռիչքներին չսպառնալ և պահպանել թռիչքների ռեժիմը»,-նկատեց Մանոյանը:

Վերջինիս խոսքով, ՀՀ իշխանությունները մինչև նախագահական ընտրությունները հետ չեն վերցնի ստորագրությունները`« լավ գործընկեր» երևալու համար:

Անդրադառնալով Իվանիշվիլու հայտարարությանը, Կիրո Մանոյանը նշեց, որ Իվանաշվիլու հերքումը հստակ չէ, ինչ-որ ասել է ճիշտ և ընդունելու բան չէ: « Մեր համար, հայության համար, հատկապես Ջավախքում ապրող հայության համար կարևոր է այս նոր իշխանությունների նախընտրական շրջանի իրենց բավական զուսպ ելույթները Ջավախքի մասին, պիտի ասել, որ ավելի դրական  հույս ներշնչելու հիմք կար, քան գործող իշխանությունների պահվածքի մեջ»,-ասաց նա:

Կիրո Մանոյանը հրաժարվեց պատասխանել  ներքաղաքական կյանքին վերաբերող հարցերին, այդ թվում Վարդան Օսկանյանի գործին վերաբերող, միայն ասաց, որ կատարվածն այնքան անհեթեթ է, որ երկրի միջազգային հեղինակության վրա  է ազդում:

Իսկ «Հայկական Վարկածի» այն հարցին, թե լուրեր են շրջանառվում, որ ՀՅԴ անդամ, ԼՂՀ փոխվարչապետ Արթուր Աղաբեկյանը կապ ունի «Գոմեշի մսի» պատմության հետ, Կիրո Մանոյանը առաջարկեց զանգ տալ Արթուր Աղաբեկյանին և իրենից ճշտել. ինքը տեսակետ չունի այդ հարցով: