Կիրակի օրերին Խորենացի — Ագաթանգեղոս փողոցների հատման մասը վերածվում է գյուղմթերքների շուկայի:

«Տեղանքը քաղաքապետարանի հետ ենք ընտրել, հարմարության տեսանկյունից, որ և սպառողներին հարմար լինի, և վաճառողներին» ի պատասխան մեր այն  հարցին, թե՝ որն է գյուղնախարարության ընտրության տրամաբանությունն, ասաց փոխնախարար Ռոբերտ Մակարյանը:

Նախ անհասկանալի է, թե ինչո՞ւ են որոշել գյուղմթերքներ վաճառել հենց փողոցի վրա և այն  փակելու պայմանով, երբ դրանից մի քանի մետրի վրա կա ազատ հրապարակ, որտեղ մարզեր մեկնող ավտոբուսների կայանտեղին էր ու տեղափոխելուց հետո ,այժմ, ընդամենը մի քանի ավտոմեքենա է կանգնում:

Ֆեյսբուքի օգտատերերից մեկն ի պատասխան «Վարկածի» սոցցանցում հայտնած տարակուսանքին, ասաց. Սրանից հետո մարմանավաճառներին սեղանի վրա են վաճառելու:

Իրոք, նախկին Առևտրի տան մոտ հավաքվող մարմանավաճառները ավանդույթը չեն խախտում ու որոշակի ժամից այս հատվածում աշխույժ առևտուր է լինում: Շաբաթ -կիրակի օրը,  ինչպես տեղեկացրեց գյուղնախարարության  աշխատակիցն,  այնտեղ գյուղացին բերում է իր ապրանքը և վաճառում առանց կշեռքի ու տեղի փող վճարելու, այսինքն՝ առավել էժան: Հետաքրքիր է, ինչու հենց այդ հատվածում, երբ մի կանգառ ներքև Գումի շուկան է և ինչո՞ւ փողոցը փակելու պայմանով. Այս հարցին մեր զրուցակիցը պատասխան չուներ:

Երևանի քաղաքապետարանի լրատվական վարչության պետ Արթուր Գևորգյանը պարզաբանեց. «Այդ տարածքն ենք ընտրել ` համաձայնեցնելով Ճանապարհային ոստիկանության հետ, քանի որ ամենաթեթև փողոցներից մեկն է: Իսկ մեքենաների համար հարմար ճանապարհ կա`գնում են ուղիղ, հետո թեքվում են Տիգրան Մեծով»:
Մեր հաջորդ հարցին թե՝ սա քաղաքում միա՞կ փողոցային շուկան է, Գևորգյանն ասաց.«Մյուսն էլ գտնվում է Կասյան փողոցում` Մերգելյան ինստիտուտի հարակից այգու դիմաց»: