ՀՀ ԿԸՀ նախագահ Տիգրան Մուկուչյանը այսօր լրագրողների հետ հանդիպման ժամանակ տեղեկացրեց որ 2012 թվականի սեպտեմբերի 9-ին տեղի ունեցած տեղական ինքնակառավարման մարմինների ընտրությունները կայացել են 379 համայնքներում, 716 համայնքի ղեկավարի թեկնածուներից ընտրվել են 379-ը, իսկ 4073 ավագանու անդամի թեկնածուներից՝ 2905-ը, ընդգծելով, որ որևէ համայնքում ընտրություններն անվավեր չեն ճանաչվել.

Նա տեղեկացրեց, որ ընտրված 379 համայնքի ղեկավարներից  95-ը անկուսակցական են, հանրապետական են 238-ը, 21-ը՝ «Բարգավաճ Հայաստան»-ից, 9-ը՝ «Օրինաց երկրից», 16-ը դաշնակցական են:

2905 ավագանու անդամներից 1888-ը անկուսակցական են, 759-ը՝ ՀՀԿ-ական, 2-ը՝ «Ժառանգություն» կուսակցությունից,  35-ը՝ ՕԵԿ-ական, 7-ը ՀՀՇ-ական, 44-ը՝ ՀՅԴ-ական, 158-ը՝ ԲՀԿ-ական և այլ կուսակցություններից:

Ընտրությունների արդյունքները բողոքարկելու համար Վարչական դատարան են դիմել Գետափնյա և Հնաբերդ համայնքի թեկնածուները.«Հնաբերդի գործի դատաքննությունն արդեն ավարտված է: Անհրաժեշտ վերահաշվարկը կատարվել է և դատարանը վճիռ է կայացրել արդյունքն անփոփոխ թողնելու մասին: Ինչ վերաբերվում է Գետափնյա համայնքին, ապա ասեմ, որ դատարանը քննարկում է դիմումը վարույթ ընդունելու հարցը»,- ասաց Մուկուչյանը, նշելով որ ընտրությունների արդյունքները բողոքարկելու համար դատարան դիմելու ժամկետն ավարտված է:

«Ընտրված 379 համայնքի ղեկավարներից 84-ը նոր ղեկավարներ են, որոնք կազմում են 22%-ը: Նոր ղեկավար ունեցող 84 համայնքներից 41-ում նախկին ղեկավարները չեն առաջադրվել, իսկ 43-ում՝ ավելի քիչ ձայն են հավաքել: 18 քաղաքային համայնքներում ևս կան նոր ղեկավարներ»,- ամփոփեց Մուկուչյանը:

Տեղական ինքնակառավարման մարմինների ընտրությունների առաջին փուլը տեղի է ունեցել սեպտեմբերի 9-ին, առջևում երկրորդ փուլն է, որը կկայանա կիրակի՝ սեպտեմբերի 23-ին: