Այսօր լրագրողների համերաշխության միջազգային օրն է: Տոնը հաստատվել է 1958 թ. Բուխարեստում` լրագրողների միջազգային միության 4-րդ համաժողովի ժամանակ: Կոնգրեսի պատվիրակները նշել են, որ այս օրը բոլոր երկրների և հրատարակությունների լրագրողները պետք է ողջ աշխարհում ցուցաբերեն համախմբվածություն, հատկապես` իրենց իրավունքների պաշտպանության գործում:

Օրը հենց այնպես չի ընտրվել։ 1943 թ. սեպտեմբերի 8-ին մահապատժի ենթարկվեց չեխ լրագրող, գրող-հակաֆաշիստ Յուլիուս Ֆուչիկը: Նա ողջ աշխարհում հայտնի է դարձել իր «Թոկը վզին ռեպորտաժ» գրքով, որը գրել է Պրահայի բանտերից մեկում: Նրա մահից հետո գիրքը թարգմանվել է 70 լեզվով, իսկ 1958-ից Ֆուչիկի մահվան օրը` սեպտեմբերի 8-ը, սկսեց նշվել որպես լրագրողների համերաշխության միջազգային օր:

20-րդ դարավերջին սեպտեմբերի 8-ը ՄԱԿ-ի կողմից հռչակվել է լրագրողների միջազգային օր: Այն նշվում է ողջ աշխարհում, կազմակերպվում են գիտաժողովներ։