Սեպտեմբերի 9-ին  ՏԻՄ ընտրություներ կկայանան 481 համայնքներում, մասնավորապես՝ Արարատում, Արմավիրում, Լոռիում, Շիրակում, Սյունիքում: Չորս համայնքում ընտրությունը չի կայանա, երեք համայնքում բավարար քանակով թեկնածուներ չեն առաջադրվել, իսկ համայնքներից մեկում՝ Բամբակաշատում, թեկնածուներից մեկը մահացել է և ըստ օրենսգրքի՝ պետք է նշանակվեն նոր ընտրությունններ: Այս մասին այսօր, լրագրողների հետ հանդիպման ժամանակ տեղեկացրել է Կենտրոնական ընտրական հանձնաժողովի նախագահ Տիգրան Մուկուչյանը:

Վերջինիս խոսքով, ընդհանուր առմամբ,  սեպտեմբերի 9-ին կայանալիք ընտրություններին մասնակցելու համար առաջադրվել էր 5201 թեկնածու, որոնցից ինքնաբացարկի դիմում է ներկայացրել 412-ը, քվեաթերթիկներում կլինի 4789 թեկնածուի անուն: Առաջադրված 5201 թեկնածուներից 3236-ը անկուսակցական է, «Ժառանգությունից»՝ 8, ՀՀԿ-ից՝ 1444, ՕԵԿ-ից՝ 64, ՀՀՇ-ից՝ 18, ՀՅԴ-ից՝ 101, ԲՀԿ-ից՝ 304 թեկնածու և այլն:

Տիգրան Մուկուչյանը նշել է, որ ամենամեծ համայնքը Գյումրին է, այն ունի  79 տեղամաս, իսկ ամենափոքրը Սյունիքի Քաշունի համայնքն է, որն ունի ընդամենը 19 ընտրող: Ավագանու անդամի ամենաշատ թեկնածուները` թվով 72, կրկին Գյումրիում է: Համայնքների  35 տոկոսում լինելու է միայն մեկ թեկնածու, իսկ 4 քաղաքաjին համայնքներում՝ Կապան, Քաջարան, Ագարակ, Թումանյան, ընտրությանը կմասնակցի մեկ թեկնածու:

Անդրադառնալով Ախթալայում, Գյումրիում և Կապանում տեղի ունեցած միջադեպերին, ԿԸՀ նախագահը տեղեկացրել է, որ Տեղական ինքնակառավարման մարմինների ընտրություններից առաջ տեղի ունեցած միջադեպերը՝ ծեծկռտուքներ, կրակոցներ, անցկացվող ընտրությունների որակի վրա լուրջ ազդեցություն ունենալ չեն կարող: