Դիզայներ Դավիթ Մարգարյանի և Սամվել Հովհաննիսյանի առաջարկով, Zyabs ստեղծագործական թիմը համալիր ծրագիր է ստեղծել iPad-ի համար, որի օգնությամբ կարելի է սովորել հայոց այբուբենի տառերը, ավելի քան 230 բառ և 38 բանաստեղծություն: Այն անվանվում է Learn Armenian («Սովորիր հայերեն»):

Ծրագիրը բաղկացած է 3 բաժնից. առաջինի օգնությամբ կարելի է սովորել, կարդալ, գրել և արտասանել հայոց այբուբենի տառերը, ինչպես նաև՝ սովորել 230 բառ և 38 բանաստեղծություն: Առաջին բաժին մուտք գործելով ցանկացած տառի ենթաբաժին՝ կարելի է տեսնել և/կամ լսել տվյալ տառն ու համապատասխան առարկայի նկարազարդումը, գրել կամ նկարել տվյալ տառը, սովորել 5 բառ, որոնք կօգնեն զարգացնել տվյալ տառի լսելու, արտասանության, կարդալու հմտությունները: Ինչպես նաև՝ լսել և կարդալ յուրաքանչյուր տառին ու բառին համապատասխան բանաստեղծությունը:

Ծրագրի մյուս  բաժիները համեմատաբար ավելի պարզ են` նախատեսված թերթելու տառերը, կենդանիների ու առարկաների նկարները:

Մասնագետները հատուկ աշխատանք են տարել  նաև նկարների էսթետիկ ձևավորմանը. նրանք  ստեղծել են բարի ու գունեղ կերպարներ:

Սամվել Հովհաննիսյանի համոզմամբ` Learn Armenian-ը իր համարժեքը չունեցող ուսուցողական համալիր ծրագիր է, որը երեխային կօգնի հեշտությամբ յուրացնել հայոց այբուբենի տառերը և լավ հիմք կհանդիսանա ճիշտ լեզվամտածողության համար: