Դատապարտելով Հայ ազգային կոնգրեսի ակտիվիստների դեմ հրապարակված դատավճիռը` իրավապաշտպան մի շարք կազմակերպություններ հայտարարություն են տարածել:  Նրանք ՀՀ իշխանություններից պահանջելով դադարեցնել քրեական հետապնդումը:

Հայտարարության մեջ, մասնավորապես, ասվում է.

«2012 թ. հուլիսի 20-ին Երևանի Կենտրոն և Նորք Մարաշ վարչական շրջանների ընդհանուր իրավասության դատարանը օրենքի խախտումով դատապարտեց ՀԱԿ երիտասարդ ակտիվիստներ Տիգրան Առաքելյանին` 6 տարի, Արտակ Կարապետյանին` 3 տարի, Դավիթ Քիրամիջյանին և Սարգիս Գևորգյանին` 2-ական տարի ազատազրկման ՀՀ քրեական օրենսգրքի 316 (իշխանության ներկայացուցչի նկատմաբ դիմադրություն բռնությամբ կամ բռնության սպառնալիքով) և 258 (խուլիգանություն) հոդվածներով:

Գործի քննությունը, որը սկսվել է 2011 թվականի օգոստոսի 9-ից, և որի ամբողջ ընթացքում Տիգրան Առաքելյանի հանդեպ որպես խափանման միջոց կիրառվել է ազատազրկումը, ընթացել է օրենքի բազմաթիվ խախտումներով: Այդ թվում`

ա. Երիտասարդներին ներկայացված մեղադրանքը կառուցված է սույն գործով որպես տուժող և վկա ներգրավված ոստիկանության աշխատակիցների ցուցմունքների վրա:

բ.  Միջադեպին ականատես են եղել բազմաթիվ անձինք, ովքեր կարող էին գործի հանգամանքների վերաբերյալ արժանահավատ, օբյեկտիվ ցուցմունքներ տալ, սակայն նրանք նախաքննության ընթացքում չեն հարցաքննվել:

գ.  Ինչպես բերման ենթարկվելիս, այնպես էլ որպես կասկածյալ ձերբակալելու պահին ՀԱԿ ակտիվիստները զրկված են եղել պաշտպան ունենալու իրավունքից:

դ. Բերման ենթարկելու, ինչպես նաև որպես կասկածյալ ձերբակալելու վերաբերյալ արձանագրությունները կազմվել են առանց փաստաբանների ներկայության:

ե. Փաստաբան Վահե Հովսեփյանի կողմից հաղորդում է ներկայացվել ՀՀ գլխավոր դատախազին` մասնագիտական պարտականություններին խոչընդոտելու և իր նկատմամբ բռնություն կիրառելու փաստի կապակցությամբ, սակայն նշված հաղորդման հիման վրա քրեական գործի հարուցումը մերժվել է:

զ. Նախաքննության ընթացքում պաշտպանության կողմի միջնորդությամբ որպես վկա հարցաքննվել են միջադեպին ականատես մի շարք անձինք, սակայն վերջիններս այդպես էլ չեն ընդգրկվել դատակոչի ցուցակում:

է. Նախաքննության ընթացքում ճնշում է գործադրվել միջադեպին ականատես այն անձանց վրա, ովքեր որպես վկա ցուցմունք տալու նպատակով տեղափոխվել են ոստիկանության Կենտրոնական բաժին:

Այս ամենից զատ, մտահոգություն է առաջացնում այն փաստը, որ շատ ավելի ծանր դեպքերի առնչությամբ դատարանը կայացրել է նույնիսկ ազատազրկում չնախատեսող վճիռներ: Հետևաբար, դատավճիռը ինքնին և պատժաչափերը, որոնց դատապարտվել են երիտասարդ ակտիվիստները մեր կողմից որակվում են որպես խտրական արդարադատության կիրառում:

Ընդդիմադիր հայացքների տեր երիտասարդ ակտիվիստների նկատմամբ նման վճռի կայացումը մեկ անգամ ևս փաստում է, որ 2008թ. նախագահական ընտրություններին հաջորդող բռնությունները և քաղաքական հալածանքները Հայաստանում ոչ միայն չեն դադարել, այլև նոր նախագահական ընտրությունների շեմին նոր որակ ու նոր դրսևորումներ են ստանում: Սա մի կողմից կարելի է դիտարկել որպես գալիք նախագահական ընտրությունների նախաշեմին հանրության մեջ վախի մթնոլորտի տարածման փորձ, իսկ մյուս կողմից՝ադմինիստրատիվ ռեսուրսի հիմնական ապահովող ռեպրեսիվ իրավապահ համակարգին՝անկաշկանդ գործելու հրահանգ:

Մենք` ներքոստորագրյալ իրավապաշտպան կազմակերպությունների ներկայացուցիչներս, խստորեն դատապարտում ենք արդարադատության հետ աղերս չունեցող նման վճռի կայացումը և ՀՀ իշխանություններից պահանջում`

Դադարեցնել քրեական հետապնդումը Տիգրան Առաքելյանի, Արտակ Կարապետյանի, Դավիթ Քիրամիջյանի և Սարգիս Գևորգյանի նկատմամբ:

Վերջ տալ քաղաքական հետապնդումներին, հալածանքներին ու բռնություններին;

Հրաժարվել խտրական դատավարություններց և արդարադատության միտումնավոր նենգափոխման արատավոր պրակտիկայից:

Կոչ ենք անում նաև միջազգային իրավապաշտպան կազմակերպություններին՝ իրենցուշադրությունը սևեռել այս գործի վրա և ջանք չխնայել երիտասարդ ակտիվիստների հտապնդումները դադարեցնելու և Տիգրան Առաքելյանին անհապաղ ազատ արձակելու ուղղությամբ»:

Հայտարարությունը ստորագրել են «Երիտասարդություն հանուն ժողովրդավարության», «Հելսինկյան քաղաքացիական ասամբլեայի հայկական կոմիտե», Իրավունքի և ազատության կենտրոն, Ժուռնալիստների «Ասպարեզ» ակումբ, «Համագործակցություն հանուն ժողովրդավարության», «Հելսինկյան քաղաքացիական ասամբլեայի Վանաձորի գրասենյակ»,

«Թրանսփարենսի ինթերնեշնլ հակակոռուպցիոն կենտրոն» կազմակերպությունները: