Ոստիկանության քննչական գլխավոր վարչության պետ Գագիկ Համբարձումյանը հայտարարել է, որ Հայաստանի ոստիկանությունը միջնորդելու է կալանավորել պատգամավոր Նահապետ Գևորգյանի որդուն` Արտակ Գևորգյանին:

Ըստ նրա` հաշվի առնելով, որ այսօր ավարտվում է ձերբակալման ժամկետը, այսօր էլ ներկայացվելու է կալանքի միջնորդությունը: «Հուսով ենք, որ դատարանը կբավարարի այն»,- նշել է Համբարձումյանը:

Գագիկ Համբարձումյանի փոխանցմամբ, քննությունը կպատասխանի` արդյոք Արտակ Գևորգյանը դեպքի պահին ալկոհոլի ազդեցության տակ է եղե՞լ, թե` ոչ:

Հիշեցնենք, որ պատգամավորի որդին` Արտակ Գևորգյանը, հուլիսի 18-ին ոչ սթափ վիճակում և զենքի պարտադրանքով Արմավիրի մարզի Սարդարապատ գյուղի գազալցակայանի մոտիցառևանգել էր 25-ամյա մի երիտասարդի պատկանող «ԳԱԶ 24»-ը և հեռացել:

Նույն օրը ոստիկանության ձեռնարկած միջոցառումների արդյունքում Ա. Գևորգյանը ձերբակալվեց, իսկ երեկոյան խուզարկությամբ նրա բնակարանից հայտնաբերվեց և առգրավվեց ատրճանակ:

Գագիկ Համբարձումյանն անդրադարձել է նաև մայիսի 4-ին Հանրապետության հրապարակում տեղի ունեցած փուչիկների պայթյունի գործի ընթացքին: Նա նշել է, որ դրա վերաբերյալ պարզաբանումն արդեն իսկ տրվել է ոստիկանության կողմից, և «փուչիկների գործով» մեղադրանք չի առաջադրվելու ո´չ լիցքավորողի, և ոչ էլ պատվիրողների նկատմամբ: