ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է Իրանի Իսլամական Հանրապետության նախագահի տեղակալ, Բնապահպանական կազմակերպության նախագահ Մոհամմադ Ջավադ Մոհամմադիզադեհի գլխավորած պատվիրակությանը:

Ըստ ՏԿՆ նախարարության մամուլի ծառայության հաղորդագրության՝ փոխվարչապետը նշել է, որ վերջին տարիներին Հայաստանի և Իրանի միջև հարաբերությունները դինամիկ զարգանում են:

Արմեն Գևորգյանն ընդգծել է, որ Հայաստանը և Իրանն արդյունավետ համագործակցում են մի շարք ոլորտներում, և կարևորել բնապահպանության ոլորտում տարածաշրջանային համագործակցության խթանումը, ինչպես նաև հարևան երկրների հետ արժեքավոր էկոհամակարգերի պահպանության ոլորտում համատեղ ռազմավարության և միջոցառումների իրականացումը:

Իրանի փոխնախագահ Մոհամմադ Ջավադ Մոհամմադիզադեհը շնորհակալություն է հայտնել ընդունելության համար և գոհունակություն հայտնել երկու երկրների միջև բարձր մակարդակի հարաբերություններից` նկատելով, որ մի շարք ոլորտներում դեռևս առկա է համագործակցությունը խորացնելու մեծ ներուժ:

Հանդիպմանը, որին ներկա է եղել նաև ՀՀ բնապահպանության նախարար Ա. Հարությունյանը, քննարկվել են հարցեր` Իրանի և Հայաստանի ընդհանուր սահմանում Բարեկամության և խաղաղության այգի հիմնելու, Արաքս գետի ջրային ռեսուրսների օգտագործման, ջրի որակի բարելավման վերաբերյալ:

Արմեն Գևորգյանը ողջունել է այգի հիմնելու գաղափարը՝ նշելով, որ այն բացի կենդանական և բուսական հատուկ պահպանվող տարածք լինելուց, կարող է լուրջ խթան հանդիսանալ էկոտուրզմի զարգացման համար:

Խոսելով Արաքս գետի ջրային ռեսուրսների աղտոտվածության խնդրի մասին, ՀՀ փոխվարչապետը նշել է, որ Հայաստանի համար ջրային ռեսուրսների մաքրության հարցը ռազմավարական նշանակություն ունի`ընդգծելով, որ հատկապես վերջին տարիներին բնապահպանական հիմնախնդիրները ՀՀ կառավարության ուշադրության կենտրոնում են:

Անդրադարձ է կատարվել նաև ԻԻՀ-ում կոյուղաջրերի մաքրման կայանների առաջատար փորձին և այն Հայաստանում ներդնելու հնարավորությանը:

ՀՀ փոխվարչապետը տեղեկացրել է, որ «Սևանա լճի բնապահպանական» ծրագրով Սևանի ափամերձ տարածքներում կեղտաջրերի մեխանիկական մաքրման կայանների ծրագիր է իրականացվում, և իրանական փորձը հայկական կողմի համար կարող է հետաքրքիր լինել:

Հանդիպմանը քննարկվել են նաև երկկողմ հետաքրքրություն ներկայացնող այլ հարցեր: